Shillong, Nailur 29
U khlur ak phlim ba paw ka Bollywood, kata u Ahaan Panday, uba dei u Tyngshop pawkhmat ha ka phlim ‘Saiyaara’ u la wan poi ha Nongbah Shillong ha kine ki taïew ba la dep.
Kane ka phlim ba u tei u Tyngshop u la ak, kadei ka phlim kaba la ïaid ïew bha ha ki Cinema ha India bad ruh ha kylleng ka pyrthei.
Ha ka taïew ba u tei u Tyngshop u la wan poi ha Shillong, ki dur bad ki durkhih ki la saphriang ha ki rynsan social media, ha kaba ki paidbah nongkyrshan ki la ïa knieh ban shondur lang bad u haba u poi ha Shillong. U Ahaan Panday u la wan ha Shillong ha ryngkat bad u Director, u Mohit Suri.
La ïohi ruh lyngba kawei ka dur ba ki nongtrei bad ki paidbah ki la ïa shondur lang bad u tei u Tyngshop ha kawei ka Restaurant kaba don ha Laitumkhrah, ba kyrteng ka ‘Roma Eatery’.
Kumta na ka liang u nongthoh khubor jong u Nongsaiñ Hima ha ka 29 tarik u Nailur 2025, u la leit ban ïakynduh kyrpang bad ki nongtrei jong katei ka Restaurant ban ïakren halor ka jingwan poi jong u tei u Tyngshop ha katei ka dukan.
Haba ïoh ban ïakren bad u wei u nongtrei hapoh katei ka Restaurant, u la ïathuh ba u tei u Tyngshop ba paw ka Bollywood, kata u Ahaan Panday u la wan poi ha katei ka Restaurant ha ka janmiet jong ka sngi Thohdieng ka 26 tarik u Nailur 2025, ban wan bam ja miet ha ryngkat ki nongbud jong u.
U ne u samla u la ïathuh ba nyngkong kim tip ba u ne u Tyngshop un wan bamja ha kane ka dukan jong ki, da kaba pynpaw ïa ka jingsngew lyngngoh ba kat u khlur ba paw ka Bollywood un wan bamja miet ha ka Restaurant ba ki trei.
“Ngi la ïoh ban ïakren khyndiat bad u ne u Tyngshop, da kaba ong ba ngi dei ki nongkyrshan jong phi. Ka mynsiem ka sngewkmen ban ïakynduh markhmat bad u Tyngshop ba paw,” la ong u tei u samla.
Haba kylli u la ong ba u ne u Tyngshop u la shong tang kumba shi kynta eiei ha dukan ban bam ja miet shuwa ba un leit noh. U la ïathuh ruh ba um don jingtip eiei halor ka jingwan u Ahaan Panday sha Shillong, bad lehse u wan ban peit ïa ki jaka kiba itynnad ha Shillong, ban ringdur ïa ki phlim thymmai jong u.
Shuh-shuh u ne u samla u la ïathuh ruh ba naduh ba u trei ha katei ka restaurant ki don haduh 4 ngut ki Tyngshop ka Bollywood kiba la wan bamja ha kane ka dukan.
