Shillong, Nailur 29
Ka Nangkiew Irat SC ka la lah ba kan wanphai biang da ka jingjop ha ka lympung ïalehkai Shillong Premier League 2025, hadien ba ka la lah ba kan pynliem noh ïa ka Malki SC da 5-0 kol ha ka lah sngi U Blei ha SSA Stadium kaba ha First Ground, Polo.
Dei lyngba kane ka jingjop, ba ka Nangkiew Irat ka la kiew sha ka kyrdan kaba halor duh jong ka miej ïakheiñ point ha kane ka lympung mynta ka samoi.
Ïa kine ki san tylli ki kol la thep ïa ki da Ronaldkydon L Nonglait (39), Jefferson Pakynteiñ (58), Wallamsuk Nongkhlaw (63), Himanshu Patil (69′) bad u Banshanlang Nongdhar (90+2P).
Kumta da kane ka jingjop, ka Nangkiew Irat kan ïoh ban khur 13 point, katba na ka liang ka Malki SC ka la ïai neh ha ka kyrdan kaba phra hadien ba ka la ïoh ban khur 6 point bad ban don shabar u line saw (relegation zone), hynrei kan dei pat ka sien kaba lai ïa kane ka kynhun ba kan shah thep haduh san kol ha ka jingïakhun jong ka.
Hadien ba ka la khur tang shi point ha ki ar tylli ki jingïalehkai ba la lah, ka Nangkiew ka la wanphai da ka jingkhlaiñ bor ban ïakhun tyngeh naduh kaba sdangbad ban khur ïa kane ka jingjop.
Na ka liang ka Malki ka la kham ïalehkai kham bha bad ka kabu ksiar ka wan hadien ba u Elishar Ryntathiang u la pynlong ïa u rangapkol ka Nangkiew u Surjay Kumar Pariyar ba un hap ban kham pynsting ïa la ka jong ka met ban kyrda na ka jingshah thep bol bad hadien kane ha ka minit kaba 30 u Cannyson Kharnaïor u la ïoh ban khyrwit tyngeh ïa ka bol kaba pynurlong sha ka corner.
Haba wan ban bteng ïa ka kylla miet, ka Nangkiew ka la kham kyntiew ïa la ka rukom ïalehkai jong ka, haba ïa nujor pat ïa ka Malki SC, ka la pyrshang katba lah ban shu ker kut ban lait na ka jingshah thep. Pynban ka jingkhang ka la plie hi war na ka bynta ka Nangkiew Irat hadien ba u rangapkol ka Malki u Franklin, uba dang shu dep ban kyrda ïa kawei ka kol, ha kaba u la lah ban tem shwa shipor ïa kane ka bol, hynrei ha ka jingbakla u la pyntyllun ïa ka bol sha ki paralok ba ïalehkai lang, pynban ka la kum poi pynban sha ka phang ba la don u rangïalehkai jong ka Nangkiew bad khlem kano kano ka jingbakla ba un shu thep suk ïa ka kol.
Hadien kane, ka jar jong ka diengkol ka Malki ka la sdang ba kan khih ir shi ir bad haduh kaba kut ka la hap ban mad ïa ka jingshah rem.
Ka jingïalehkai ha ka sngi Ba-ar kan long hapdeng ka Nongrim Hills pyrshah ïa ka Langsning FC ha ka por 4:30 nohphai sngi.
