Shillong, Nailur 29
Ki arngut ki longkmie ki la wanrah nam ïa ka Jylla baroh kawei, hadien ba ki la jop ha ka jingïakop thei bhabriew ha Jaipur, Rajasthan.
Kine ki arngut kiba la wanrah nam ki kynthup ïa ka Kong Rina Kharbudnah, ba 38 snem ka rta kaba la jop ïa ka First Runner up ha ka Divalicious Mrs India Universe 2025, bad ka Silbarina D Shira na ri lum Garo, ba 51 snem ka rta, kaba jop ha ka Divalicious Mrs North East India 2025.
Kane ka jingïakop thei bhabriew kadei kaba la pynïaid da ka Naresh Madaan myn ha ka 21 Tarik u Nailur 2025, ha Jaipur, Rajasthan.
Ka Kong Rina Kharbudnah ka la jop ïa ka First Runner up ha ka Divalicious Mrs India Universe 2025, ha kaba ka la shah jied ruh ban mihkhmat sa sha ka Mrs India Universe International ka ban dei shabar ri, ha u snem ban wan, kata ha u snem 2026.
Ka Kong Rina kadei na ka shnong Nongumlong, 3 mile, bad kaba la don 7 ngut ki khun, kaba dei ruh tang ka nongkhaïi dohkha bad nongkhaïi jhur bad lyngba ka jingai mynsiem ki bahaïing hasem bad ka jingangnud, ka la poi shaduh kane ka thong.
Ka Silbarina D Shira pat kaba dei na Garo, ba 51 snem ka rta, kaba don ar ngut ki khun, ka la wanrah nam ïa ka Jylla hadien ba ka la jop ïa ka Divalicious Mrs North East India 2025, kaba ka long ha katei hi kajuh ka sngi, ka 21 Tarik u Nailur 2025, ha Jaipur, Rajasthan.
Haba kren sha ki lad pathai khubor ha ka sngi Nyngkong jong ka taïew ha Shillong Press Club, ki tei ki longkmie ki la pynpaw ïa ka jingsngewkmen hadien ba ki la wanrah nam ïa ka Jylla bad ïa ka ïing ka sem hi baroh kawei.
Haba kylli ki la ïathuh ba kim shym la don nongïarap ha ka por ba ki leit ha katei ka rynsan ïakop, hynrei da i bor i barit ki la pyrshang nalade hi bad kadei tang ka jingkyrshan na ki bahaïing ha sem.
“Ki don bun ki nongïa shimbynta bad ka la don ka jingïakop hadpeng jong ngi bad kiwei ki nongïakhun, hynrei watla katta ruh ngim duh jingkyrmen namar ngi la dep pynkhreh,” ki la ong.
Nalor kata, ki la ïathuh ruh ba naduh mynshwa ha ka por ba ki dang samla, ki la don ïa kane ka jingthmu, hynrei namar ba ki la ïoh lok kloi bad ïoh khun kloi kumta kim don shuh ka por bad dei haduh mynta ba ki khun ki la heh ki sa ïoh ïa kane ka lad ban ïakop ha kum kine ki rynsan.
