D H Kharkongor
Kumno lada yn shu ïa mutdur ne yn shu ïa ‘imagine’, kumba rwai u John Lennon. Ngin ïa mutdur lane ‘imagine’ kaei ka ban jia lada kan mih ka rai ba baroh ki ‘Tourist Cab’ kiba na Assam, kiba wan ïalam ïa kiba thmu ban wan rkaipyrthei, sha ki jaka rkaipyrthei kiba don ha kylleng jong ka Ri Khasi, kin hap ban sangeh noh thik tang hangne ha Shillong. Mutdur shwa tang ïa kiba sdang beit thikna na Guwahati bad kiba thmu ban shu ‘Tour’ ne rkaipyrthei beit thik tang shisngi bad ruh thik tang sha kawei ka phang. Lehse ïa kiba thmu beit thik tang sha Sohra lane thik tang sha Mawlynnong lane thik tang sha Dawki-Shnongpdeng. Ynda kumta ki ‘Tourist’ bapli kin hap ban leit kyrpang shwa tad haduh ka jaka kaba kin shim pat de da ki ‘Tourist Cab’ jong ka AMKTTA, na kaba kin bteng ïa ka jingleit rkaipyrthei ka jong ki. Ki bapli kin latkai lane kin bijai kai tad naduh ka por, kaba kordor ka jong ki, tad haduh ka bor met wei ba kin hap hiar noh shwa na kawei ka kali, lem bad la ki jingrah jingrong, na ka bynta ban kiewbiang sa ha kawei pat ka kali,lem bad la ki jingrah jingrong. Ki bapli kin hap mad biang sa shisien ïa kata kajuh ynda haba ki la wan phai na kata ka jingrkaipythei, kata, ha shwa ba kin leit phai biang noh sha Guwahati. To ïarap pyrkhat lem hangno yn mang kyrpang ïa kaba kum kata ka jaka kaba kyrpang ne kaba bit (convenient) ba kin ïa bujli kali.
Kane ka jingmutdur lane ka ‘imagination’ ka pynkynmaw ïa nga sa ïa kato ka jing-rwai kaba ong ‘Kumba leh ma phi ngan leh lem’. Kaei kaei kaba ngam lah khlem da rymmuiñ weibriew. Kumta ym lah khlem da mutdur kaei ka ban jia ïa nga ïa phi lada ka Assam ruh kan leh lem kumjuh. Nga kum ‘imagine’ ba ka Assam ruh kan nym shah shuh ia ki ‘Tourist Cab’ jong ka jylla Meghalaya, khamtam kiba nangne na Ri Khasi, ba kin leit buh briew ne leitshaw briew tad haduh ne tad naduh ka LGB International Airport, Guwahati bad ruh tad haduh ne tad naduh na ka Guwahati Railway Station, Paltan Bazar. Kam eh ïa ka Assam ba kan sei madan ïa la ki jong ki daw ki dong ba balei ba kam shah shuh.
Ynda kumta ki ‘Tourist Cab’ kiba na Ri Khasi kin hap ban pynhiar beit noh ïa ki nongleit jingleit tang ha ‘Jorabat Junction’ na kaba ki nongleit jingleit kin hap ban ïaid shwa da ka kjat, ha ryngkat la ki jingrah jingrong, na ka bynta ban leit kiew pat de da ki ‘Tourist Cab’ jong ka Assam, kata, ba kin bteng biang ïa ka jingleit lynti ka jong ki tad haduh ha LGBI Airport, Guwahati lane tad haduh ha Guwahati Railway Station, Paltan Bazar. Ynda haba ki wan phai biang shane sha Ri Khasi ruh kin hap leh hi kumta kumjuh. Lada na LGBI Airport lane Guwahati Railway Station ki bapli kin hap ban shim shwa da ka ‘Tourist Cab’ jong ka jylla Assam tad haduh ha ‘Jorabat Junction’ na kaba kin shim biang pat da ki ‘Tourist Cab’ jong ka AMKTTA. ñiuma u ‘Tourist’ te u dang don lad ban leit rkaipyrthei noh sha kiwei kiwei pat de ki jylla jong kane ka thaiñ Shatei Lam mihngi hynrei ngi te ngim lah lait na kaba hap ban leit kiew ‘Flight’ lane leit kiew ‘Train’ naduh nangtei na Guwahati. Kaba katno tam ïa u bym kotbor ba leit ban wan da ka ‘Flight’, wei haba ngim don ïa la ka jong ka ‘Railway Connectivity’.
Ko Sorkar MDA – II, to da puson sani bha ioh ba mih pyrthei pynban, wat hangne ha Ri Khasi, da ka ‘Taxi Mafia’ kumba long ha Goa. Ka ‘Taxi Mafia’ ka ban bam kruin pynban suki pa suki jai bad ruh napoh napoh ïa ka ‘Khasi Hills Tourism Industry’ hi baroh kawei, kumba bam la kruin ka ‘Goa Taxi Mafia’ ïa ka ‘Goa Tourism Industry’ hi baroh kawei. Hei-ho to da puson sani bha ioh ba kin shah shim kabu pynban ki ‘Tourist’ ha ki ‘Taxi Mafia’. Ynda kumta kan ktah jur syndon tad haduh ïa ka nam bad ka burom jong ka Ri Khasi hi baroh kawei. Ynda kumta wat tang ban shu leit buhnangne na Shillong shathie sha Sohra beit thik ruh kin ïa oh dor haduh 7000-8000 tyngka. Nangne na Shillong tad haduh ha Dawki-Shnongpdeng pat ruh tad haduh 13,000-14,000 tyngka. Ym tang kumta hynrei kan mih ruh de sa ka jingïathan paramaki. Ynda kumta kan sa mih ka jingïathan ba sha ka thaiñ Sohra dei ban kamai beitthik tang kiba na ka thaiñ Sohra katba sha ka thaiñ Dawki-Shnongpdeng pat de dei ban kamai beit thik tang kiba na ka thaiñ Dawki-Shnongpdeng. Ym tang kumta hynrei wat tang na Shillong Airport, Umroi tad haduh ha Khyndai Lad ruh ka dor kannym duna ïa ka 2500-3000 tyngka bad ba ym kamai beit thik tang kiba na ka thaiñ Umroi. ïa kiwei kiwei, ki bym dei na ka thaiñ Umroi, yn shah beit thik tang ba kin shu wan on hynrei ym bit ba kin wan shaw kyrpang. Na ISBT, Mawiong tad haduh ha Khyndai Lad pat ruh ka dor kan long 1000-1500 tyngka nalor ba yn kamai beitthik tang kiba na Mawiong. ïa kiwei kiwei ka bit beit thik tang ba kin shu wan on hynrei ym bit tdot ba kin wan shaw kyrpang. Ka jingïathan kam duh wei ba ngi dei ka jaitbynriew kaba tang ka jingïabishni bad jingïapihuiñ, wat paramangi.
