Shillong, Nailur 29
Ka Meghalaya Football Association (MFA) hadien ka jingbthah na ka All India Football Federation (AIFF) ka la shim ïa ka rai ba nangne shakhmat kan ym shah shuh ban ithuh ïa kino-kino ki seng ne ki klob ne ki synjuk, kiba pynlong ïa kino-kino ki lympung ïalehkai phutbol, khlem da ïoh jingbit na ka.
Ïa kane ka sienjam la shim ha ka jingïalang kaba shisien shi snem jong ka MFA ha u Jymmang, hynrei mynta ka la pyntreikam pura ban pynkyndit thiah ïa baroh ki lympung ïalehkai kiba la ju pynlong ha kylleng ka Jylla khamtam ha ki jaka nongkyndong.
Ka Executive Committee jong ka MFA ka la rai ba baroh ki nongpynïaid ïa ki jingïalehkai ki bym pat ïoh ka jingithuh bad ki bym pat pynrung kyrteng ha katei ka synjuk ïa kiba la ju tip kum ki jingïalehkai bosti, ki dei ban pan jingbit na ki synjuk ïalehkai kiba don hapoh ki district na ka bynta kino-kino ki lympung ïalehkai.
Nangta ki synjuk ïalehkai jong ki district ki dei ban phah ïa ki aplikeshon sha ka MFA ban ïoh ïa ka jingmynjur kaba khatduh.
Ka MFA ka la kdew ruh ïa ki jingma kiba lah ban mih pyrshah ïa ki nongïalehkai bad kumjuh ïa ki rephri kiba ïaleh pyrshah da kaba ïashim bynta ha ki lympung ki bym shym la ïoh jingbit.
“Kano-kano ka lympung kaba khlem ïoh jingbit ne khlem jingpynrung kyrteng kaba la shu pynlong khlem ka jingbit na ki synjuk ïalehkai bad kiba khlem ïoh ka jingmynjur na ka MFA kin shah pyrkhing bha,” la ong kat kum ka kyrwoh ba ka MFA.
“Ki nongïalehkai kiba la pynrung kyrteng hapoh ka Central Registration System (CRS) jong ka AIFF bad kiba la pynrung kyrteng ha ki kynhun ba ïasoh bad ka MFA, hynrei ki ïashim bynta ha kum kitei ki lympung ïalehkai kin ngat ha ki kyndon jong ka jingshah pynshitom, da kaba kin shah daiñ kuna lem bad ka jingshah sospon.”
“Ki rephri kiba long ki nongpynïaid ïa ki jingïalehkai kiba la pynrung kyrteng hapoh ka CRS bad kiba pynïasoh sha ka MFA, hynrei ki pynïaid ha kum kitei ki lympung kin mad ïa ki jingshah pynshitom, kaba kynthup ïa ka kuna bad jingshah sospon,” la ong ka kyrwoh.
“Ka MFA ka ai jingmut jur ïa baroh ki nongpynïaid, ki nongïalehkai, ki rephri bad ki official ba kin bud ryntih ïa ki rukom treikam kiba dei bad ki kyndon jong ka MFA. Kane ka sienjam ka long ban pynthikna ïa ka jingïalehkai phutbol kaba khuid, kaba shai bad kaba ryntih ha baroh kawei ka Jylla, kaba ïahap bad ki kyndon jong ka AIFF,” la pynkut ka kyrwoh jong ka MFA.
