Shillong, Nailur 29
U Bah Winston Tony Lyngdoh, u MDC ka Voice of the People Party na Nongthymmai Constituency, un sa shimti ïa ka shuki (CEM) ha Khasi Hills Autonomous District Council (KHADC) namar khlem don kyrtong na ka liang pyrshah ban ïakhun pyrshah ïa u.
U Bah Winston Tony Lyngdoh u la pyndep ïa ka jingthep kyteng ha ka step 29 tarik Nailur 2025 bad hadien ka jingpeit bniah ïa ki kot ki sla, la pdiang ïa ki kumba ki long.
Ban shu kdew hangne, ka jingdonkam ban jied CEM ba thymmai ha Khasi Hills Autonomous District Council ka dei hadien ba u Bah Shemborlang Rynjah MDC ka Langkyrdem-Laitkroh Constituency u la iehnoh ïa ka shuki kum u CEM myn ha ka 24 tarik u Nailur 2025 ha kaba u la phah shithi risaiñ ha u shongknor ka Council da kaba u la kdew ha ka shithi ba u don hapdeng ka jingbym shait bym khlaiñ ha ka met.
Haba ïoh ban ïakren bad u Secretary sha ka Khasi Hills Autonomous District Council u Bah Balentine Sohtun, u la pyntip ba tang u Bah Winston Tony Lyngdoh MDC ka Voice of the People Party ba na Nongthymmai u ba la pyndep ka jingthep kyrteng ha ka ilekshon ban jied ïa u Chief Executive Member (CEM) ba thymmai jong ka Khasi Hills Autonomous District Council (KHADC).
U Bah Sohtun u la ïathuh, haba la pynlong ïa ka jingpeit bniah ïa ki kot ki sla, baroh ki kot ki sla ha kaba thep kyrteng ban ïakhun ïa ka ilekshon shuki CEM, ki long kiba la bit la biang pura bad la pdiang ïa ki kot ki sla thep kyrteng jong u Bah Winston Tony Lyngdoh.
Shuh-shuh u Bah Sohtun u la ong, ka ilekshon CEM kan long ha ka 30 tarik Nailur ha ka por 11 baje mynstep hapoh Council Hall.
“Namar ba don tang marwei, u Bah Winston Tony Lyngdoh uba la shah tyrwa ban long kum u CEM, kumta katkum ka rule hap pynlong beit ïa ka ilekshon hynrei u Shongknor un shu pynbna ïa ka kyrteng jong u Bah Winston Tony Lyngdoh kum u CEM ba la shah jied khlem don ba ïakhun pyrshah (uncontested) hadien ba la dep ban pynbna, ki dkhot ki lah ban ïashim bynta ban ai khublei ïa u CEM ba thymmai” la ong u Bah Sohtun.
