Jowai, Nailur 30
Ka Maïa Club Umjlasiaw ka la long ka kynhun kaba nyngkong eh ban jam sha ka final ha ka lympung ïalehkai 2nd Division Football Tournament ba la pynïaid da ka Thadlaskeiñ Sports Association (TSA), hadien ba ka la lah ban pynliem noh ïa ka Ïawpynsin Wahïajer da 2-0 kol ha ka sngi Ba-ar.
Ha kane ka jingïakhun semi final kaba nyngkong kaba la long ha madan Multi Complex kaba ha Wahïajer, ka Maïa Club Umjlasiaw ka la ïoh ban pynkhih jar tang mar ïasdang ka jingïalehkai kata ha ka minit kaba 2 lyngba u Ni Phawa. Kane ka kynhun ka la pynbud biang sa shi kol ha ka kylla miet lyngba u Leimiki Dkhar ha ka minit kaba 48. Haduh kaba kut ka Ïawpynsin kam shym la lah ban pynphai bad ka la mad ïa ka jingshah rem.
Ha ka 1 tarik u Risaw ka jingïakhun semi final kaba bud kan long hapdeng ka Laru SC pyrshah ïa ka Bamkamar ha ka por 2 baje nohphai sngi.
