Shillong, Nailur 30
Ha ka Dorbar kyrpang jong ka Council ha ka sngi ba-Ar, ba la khot pynlong namar ka jingjied ïa u Chief Executive Member (CEM) ba thymmai ka Khasi Hills Autonomous Dis-trict Council (KHADC), u Bah Titosstarwell Chyne u la ong ba ka KHADC ka kynjah bha ha kine ki hynriew bnai ba la dep.
U Bah Titos u ba long u nongïalam ka liang ïatei u la pynpaw ïa kane ha ka por ba u shongknor u la ailad ïa ki dkhot ba kin ai khublei ïa u Bah Winston Tony Lyngdoh kum u CEM ba thymmai.
U Bah Titos u la ong, ba ha ki hynriew bnai ba la dep ka don ka jingïajngai hapdeng ki MDC ka liang synshar bad ki MDC ka liang ïatei, da kaba u la kdew ba kum kane kam pat ju jia ha ki por ba la dep.
Shuh-shuh u la kyntu ïa u CEM ba thymmai ba un wanrah ïa ka jingïajan hapdeng ki MDC ki ba don ha ka liang synshar bad ki MDC kiba don ha ka liang ïatei. U la ong “ha ki por ba la leit ki MDC ki don ka jingïasngewthuh jingmut, watla hapoh dorbar ki ïatied miej, hynrei kaba sngewsih ka long ba ha kine ki hynriew bnai ngim da kham ïoh koit ïa ka jingïakynduh bad kiba don ha ka liang synshar, namar kata nga kwah ba phin wanrah ïa ka jinglong jingman kaba ïajan para dkhot, namar ka jingwan jong ngi kum ki dkhot hapoh ka Council ka dei tang kawei ka thong, kaba dei ka bha ka miat jong ki paidbah ba jied ïa ngi.”
Halor kane u Bah Winston Tony Lyngdoh u la jubab kum u CEM, da kaba u la ong, “Ha ka kam ka lah ban don kumba la pynpaw da u nongïalam ka liang ïatei”, hynrei u la ïawer ïa baroh ki MDC ba na ka liang ïatei ba nangne shakhmat kin sngewlong laitluid ban wan sha u namar ka jingkhang jong ka ophis jong u ka plie ïa baroh ki MDC.
