Shillong, Nailur 30
Ka Shillong Sports Association (SSA) ka la pynbna ban pynlong biang ïa ka Women’s League Football Tournament 2025 naduh u Nohprah mynta u snem
Kat kum ka kyrwoh ba la pyllait da u Bah Samran Syiem, Assistant General Secretary ka SSA, la ong ba ka bai rung na ka bynta kawei ka kynhun kan long T. 2000/- ha kaba ïa kane dei ban siew hashwa ka 10 tarik u Naiwieng bad tang ki klob kiba la dep siew ïa ka bai pynthymmai (Renewal Affiliation Fee na ka bynta u snem 2025) ki lah ban ïashim bynta ha kane ka lympung.
Ka bai form pynrung kyrteng ka long T. 100 na ka bynta kawei pa kawei ka klob bad T. 50 na ka bynta kawei ka nongïalehkai bad ki klob ki lah ban pynrung kyrteng tang hapoh 25 ngut.
Kane ka synjuk ka la pynbna ruh ba kan shah tang ar ngut ki ‘thei ïalehkai ki bym dei ki nongshong shnong ka jylla Meghalaya kiba la lah ban shah kynthup hapoh ka thup jong ki 11 ngut ki nongïalehkai jong kawei pa kawei ka kynhun (First Division Team). La ong ba ïa kane ka lympung yn pynlong ha ka dur jong ka ‘League cum Knock Out’.
Katei ka synjuk ka la pynbna ba kan shah ïa ki coach kiba bat ïa ki kyrdan A/B/C/D/NIS licenses kiba lah ban mihkhmat ïa ki kynhun ïalehkai bad ka la ong ruh ba tang ki nongïalehkai kiba kloi ban mihkhmat ïa ka SSA ha ki lympung ki ban wan, kiba lah ban pynrung kyrteng na ka bynta ka Women’s League Football Tournament 2025.
