Washington, Nailur:
Katba u Myntri Rangbahduh jong ka Israel, u Benjamin Netanyahu, u dang pynkhreh ban leit sha White House ha ka sngi Nyngkong, U President jong ka America, U Donald Trump, u la kam ba ka jingïakren halor ka jingthmu jong u, ban pynkut noh ïa ka thma ha Gaza, ka dang don ha ka kyrdan kaba khatduh. Ha ka jingïakren bad ka Axios, une u nongïalam jong ka US u la ong ba u ïakhun pyrshah ïa ka jingïateh kular bad u Myntri Rangbah duh jong ka Israel, u Benjamin Netanyahu, kumjuh ruh bad ki ri Arab bad ka Hamas, kaba lah ban plie lad ïa ka jingsuk kaba kham heh ha ka thaiñ Middle East.
“Baroh ki la ïawan lang ban ïoh ïa ka jingïateh, hynrei ngi dang hap ban pyndep ïa ka…Ki ri Arab ki long kiba phylla ban ïatreilang halor kane. Ka Hamas ka wan ryngkat bad ki. Ki don ka jingburom kaba khraw ïa ka pyrthei Arab…Ka pyrthei Arab ka kwah ïa ka jingsuk, ka Israel ka kwah ia ka jingsuk, bad u Bibi (u Myntri Rangbahduh jong ka Israel) u kwah ïa ka jingsuk,” la ong u Trump ha ka Axios.
Katkum ka jingong jong u Trump, ka jingthmu jongu, ka thmu ban sdang biang ïa ka jingpynbor kaba kham heh ban ïoh ïa ka jingsuk ha katei ka thaiñ, nalor ban pynkut noh ïa ka thma ha Gaza.
“Lada ngi lah ban pyndep ïa kane, kan dei ka sngi kaba khraw ïa ka Israel bad ïa ka Middle East. Kan dei ka lad kaba nyngkong eh na ka bynta ka jingsuk kaba shisha ha ka Middle East. Hynrei ngi hap ban pyndep shwa ïa kane,” la ong u Trump.
