Shillong, Nailur 30
Ka Hynñiewtrep Youth Development Council (HYDC) ha ka 29 tarik u Nailur 2025, ka la ïoh ban pynskhem ïa ki dkhot ka West Khasi Hills, ha ka jingïa don lang ki samla na ki thaiñ kiba kynthup ïa ki samla na Rambrai, Lyngngam, Mawshynrut bad kiwei-kiwei.
Ha Kane ka jing pynskhem ïa ki dkhot, la ïoh ïa ka jing kren na ki nongïalam ka sengkmie, kiba kynthup ïa u Working President u Bah Bawan Nongsiej, u Bah Wyraiwan Sohtun, President bad kumjuh na u dkhot jong ka CEC, u Bah Namarkari Kharlukhi.
Haba kren sha ki samla ka West Khasi Hills, u President ka HYDC u Bah Wyraiwan Sohtun u la ong ba ka jingïa leh kam dei eh tang ban ïada ïa ki mynder kiba wan bu-hai shnong ha ka Jylla, hynrei ka thma ka dei kumno ban pynbha ïa ka ïing ka sem jong ka Bri u Hynñiewtrep.
“Ka thma ka dei beit pyrshah ïa ka jingduk. Ka thong jong ka seng ka dei ban rat dyngkhong ïa ka jingduk ha kawei pa ka wei ka longïing ha ka jaid bynriew. Kane ka thma kan sdang da kaba ngin sngewthuh ba u wei pa u wei kin biang ïa ki kam ki jam,” la ong u Bah Wyraiwan Sohtun.
U Bah Wyraiwan Sohtun u la ong ba kane ka thma kam dei eh tang jong ki nongïalam ka seng, hynrei ka dei ka thma jong baroh ki khun samla ka bri u hynñiewtrep. U la bynrap ruh da kaba ong ba ka dei ka kamram jong ki khun samla, ban pynbor ïa ka Sorkar ban shna ïa ka ’employment policy’ na ka bynta ki samla.
U Bah Wyraiwan Sohtun u la kren ruh shaphang ka jing bym lah ka District Council ban tehlakam ïa ki mynder ban seng kam ha ka Bri u Hynñiewtrep, wat hadien ba la don ka aiñ, Trading by Non Tribals,1959. Katei ka aiñ ka la khang pyrshah ïa ki mynder ba kim dei ban trei ïa ki kam kiba ki trai ri trai muluk ki la lah ban trei hi, u la bynrap.
“Kane ka dei ka wei ka jingkylli kaba ngi kum ka seng bad kum ki samla ka Ri ngi donkam ban kylli ïa ki bor ka Council bad ka Sorkar Jylla,” la ong shuh-shuh u Bah Wyraiwan Sohtun.
Nalor kata, u Bah Wyraiwan Sohtun u la kren ruh shaphang ka MIIP 2024, kaba dei ka aiñ ban ïoh kam ïoh jam ki samla ha ki karkhana kiba don ha ka Jylla, hynrei haduh mynta kane ka aiñ ruh ka sah sa tang ka aiñ bad ka khlem trei kam tang khyndiat ruh. Da kaba ong ba ki karkhana ha Byrnihat, Jaiñtia Hills, Ri-Bhoi ki wan ban kamai spah da kiba nabar khlem da pynïoh nong ïa ki trai ri trai muluk.
Ha kaba ïadei pat bad ka ‘minimum wage’, u Bah Wyraiwan Sohtun u la ong ba kam don jingmut ïa ka Sorkar ban shna ïa ka aiñ tang na ka bynta bad buh ïalade ha ka safe side ne ka liang kaba shngaiñ, khlem da pyndonkam shisha. Da kaba kdew ba bun ki karkhana bad petrol pump kim kheiñ snep satia ïa kane ka aiñ jong ka Sorkar.
U la ong ba ka Sorkar ka shna aiñ tang ban shu pynbiej ïa ki samla ka Ri khlem da don ka mynsiem ban trei shitrhem ban kiew ka jaidbynriew.
