Shillong, Nailur 30
U Chief Executive Member (CEM) ba thymmai ka Khasi Hills Autonomous District Council (KHADC) u Bah Winston Tony Lyngdoh u la kyntait ïa ki jingkynnoh ba ka jingiehnoh kam jong u CEM barim u Bah Shemborlang Rynjah ka dei ka dak ka jingbym shong shngaiñ hapoh ka Council.
“Ngam ïahap jingmut ïa ka jingkynnoh ba ka don jingbym shong shngaiñ hapoh ka KHADC. Pynban ka don ka jingshong shngaiñ hapoh ka jingïalam jong ka VPP, Ngan ong da kaba shai ba kane ka jingïa kylliang CEM ba dang shen ka dei tang kawei ka daw kata ka jingiehnoh kam u Bah Shemborlang Rynjah na ka daw ka jingpang jingshitom. Ym don da kiwei-kiwei pat ki daw. Baroh ar tylli ki EC, ka EC barim bad ba thymmai ki long kiba skhem bad ka party jong ngi ka la pyniaid beit bad kan ym don kano-kano ka jingbym shong shngaiñ, Ka jingkylla ki nongïalam ka dei shisha na ka daw ka koit ka khiah u Bah Shemborlang Rynjah” la ong u Bah Tony ha ki nonglum khubor.
Ha kaba ïadei bad ka jinglah jong u Bah Shemborlang ban shimti biang ïa ka kam CEM hadien ba u la koit, u CEM ba thymmai u la ong, “Nga tharai ba ka dang kloi palat ba ngan kren ïa kata bad ai ba u Bah Shemborlang un koit shuwa, yn sa pynbeit kham hadien, hynrei ïa kaba mynta ngin ai ka jingkitbok ba un ïoh shuwa ka jingkoit kaba pura.”
U CEM u la ong, ha kaba sdang ka EC ka hap ban ïa rai ïa ki kam ka EC kaba thymmai bad ban ïatreilang kum ka kynhun ban don ki jingïalang bapher-bapher bad ynda la ïoh ban thaw ïa ka kynhun ba thymmai ngin ïoh ïa kajuh ka rai bad ka bynta kaba ha khmat eh ba ngan buh kum u CEM ka long ban nang pynkhlaiñ shuh-shuh ïa ki kam ba la trei ha kine ki por ba la dep, ka lynti kam long kaba suk hynrei kano-kano kaba yn shim rai nangne shakhmat kan long ka jingïohnong ïa ki paidbah.
U CEM bathymmai u la pyntip ruh ba ïa ka thup kyrteng jong ki Executive Member (EM) yn sa phah sha u Lat ka Jylla bad ong ka EC kan ym buh ïa u DyCEM da kaba kdew ba ka jingdon u DyCEM kan ym don jingmyntoi eiei bad ka bor ba halor ka party ka la pyrkhat ban pynduna ïa ka jinglut ka pisa hapoh ka EC bad kumba ka EC kaba rim kam don DyCEM ka EC bathymmai ruh kan bteng kumjuh.
