Shillong, Nailur 30
Ka jingïoh mynsiem lyngba u khlur nongkawang sum u Neeraj Chopra, ka la pynlong ïa ka Anushka Tokur ba kan ïoh khur ïa ka takma ksiar ha ka ISSF Junior World Cup ha Dr. Karni Singh shooting ranges kaba ha Tughlaqabad.
Kane ka la shim por hynriew snem ba kan lah ba kan kynjoh sha ka thong naduh ba u Neeraj u la khur ïa ka takma ksiar ha ka Tokyo Olympic. Te kumta katei ka ‘thei ïalehkai kaba na Karnataka ka la khmih lynti ban khur takma sa ha ka Olympic.
Ha ka jingïakop siat jong ka 50m rifle, ka Anushka kaba dang 18 snem ka rta, ka la lah ban khur ïa ka jingjop ha ka sngi U Blei.
Kane ka long ka takma ksiar kaba lai ha kine ki ar bnai, hadien ki jingjop ha ka Asian Championships kaba la long ha Kazakhstan bad ha ka 50m prone event jong katei ka lympung. Te kumta katei ka ‘thei ïalehkai kaba dang shong klas-12 ka la ïoh 461 ha ki 45 sien ki jingsiat jong ka, ha kaba ka la lah ban tam ïa ka nongïalehkai na Russia ka Anastasiia Sorokina, kaba la ïoh 6.1 point ban khur ïa ka takma rupa (454.9), katba ka Mariia Kruglova ka la siat 444 na ka bynta ban khun ïa ka takma rnong.
Ha ka liang ki shynrang, u Adriyan Karmakar u la khur ïa ka takma rupa da kaba kamai 445.5 ha ka jingïakhun final. u rangïalehkai na Russia u Dmitrii Pimenov (449.1) bad u Kamil Nuriakhme -tov (441) ki la khur ïa ka takma ksiar bad rnong.
Ka Anushka ka la ong ba ka jingïoh ban bteng na ka bynta ban khur ïa ka ksiar ka la nang pynskhem ïa ka jingtbit jong ka bad ba kan sa shim ïa ka sienjam ha ka kyrdan jong ki nongïalehkai (senior) ha ki bnai ban wan. “Ka long ka jingsngew kaba bha ban don hapdeng ki nongjop takma. Nga shu kyrmen ba ngan dangïai bteng ban leh kham bha shuh-shuh ha ki sngi ban wan,” la pynpaw katei ka nongïalehkai kaba na Bengaluru.
Ka jingpynrung jong ka ha ka kam siat suloi ka la sdang naduh u snem 2019 haba u kpa jong ka, u la ïalam ïa ka sha kawei ka shlem ai ai jinghikai na ka bynta ka jingïalehkai ha ka por lyiur hadien ba ka la lah ban siat ïa ki balloon da ka suloi lyer (air gun) ha ka jingkhawai sngi kha. “Nga la sdang ban siat, hynrei ngam shym la sngewtynnad haduh ar snem. Hynrei ka mynsiem ka jingsngewtynnad ïa kane ka jingïalehkai ka la sdang ban kiew hadien ba u Neeraj Chopra u la lah ban khur ïa ka takma ksiar ha ka Olympic. Haba nga ïohi ïa u, nga la sdang ban sngewthuh bad nga la kilanmet bha ïa lade khnang ba ngan lah ban pynurlong kumba u Neeraj u la lah ban leh,” la ong ka Anushka, kaba la shah hikai ha ka Gun For Glory kaba long ka shlem ai jinghikai jong u Gagan Narang.
