Shillong, Nailur 30
Ka shi kol ba la thep khatduh da u Istarbor Marngar ka la biang pura ïa ka Langsning FC ban pynliem noh ïa ka Nongrim Hills SC da 3-2 kol ha ka Shillong Premier League 2025 kaba la long ha ka sngi Ba-ar ha SSA Stadium kaba ha First Ground, Polo.
Hashwa ban thep ïa katei ka kol kaba khatduh da u Istarbor Marngar (90+6), ka Langsning FC ka la thep ar kol ha ka kylla step lyngba u Richie Kharbani (32) bad u Apborlang Kurbah (34), hynrei ka Nongrim Hills ka la pynphai kylla ha ka kylla miet lyngba u Sanborlang Sohtun (79) bad kawei pat la ïarap pynthep da u rangïalehkai ka liang pyrshah u Damonlang Pathaw (81).
Da kane ka jingjop, ka Langsning FC ka la kiew sha ka kyrdan kaba lai hadien ba ka la ïoh ban khur 11 point, katba ka Nongrim Hills, ka dang lah ba kan khur tang shi point na ki hynriew tylli ki jingïakhun ba ka la lah.
Ka khana jong kane ka jingïakhun ka long ba kine ki ar kynhun, ki la pyrshang ban ïakhun tyngeh, ha kaba la don ruh ki khep ba ki la jan ïoh ïa ki kabu ban ïa pynkhih ïa ka jar, katno tam lei lei na ka kynhun ïalehkai ka Nongrim Hills, kaba donkam ba kan ïalehkai bha bad ban ïoh khur ïa ka jingjop. Pynban hapoh ki ar minit, ka Langsning ka la ïoh thep kynsan ar kol lyngba u Richie bad na u Apborlang.
Hadien ba la ïoh ban thep ïa kine ki ar kol, ha ka kylla miet, ka rukom ïalehkai na ka Langsning ka la sdang ban leh sting bha, bad ha kum kane ka rukom ïalehkai ka Nongrim Hills ka la shim ïa kane ka kabu kaba biang ban pynphai kylla shi kol lyngba u Sanborlang Sohtun bad ïa ka kol kaba ar kaba dei pat ka dei ka jingbakla thep hi da u Damonlang.
Ka jingïoh ka Nong-rim Hills ban thep ïa kine ki ar kol ka la pynkyndit bynriew ïa ki rangïalehkai ka Langsning, ha kaba ki la sdang ban ñion tyngeh ha ka bynta kaba shakhmat bad ha ka por ba la pynjlan ïa kane ka jingïakhun ba u Istarbor Marngar u la ïoh ïa ka kabu kaba biang bha ban thep hi jlang, kaba biang pura ïa ka kynhun ïalehkai jong ka Langsning ba kan khur ïa ka jingjop.
Da kane ka jingshah rem kaba hynne ka janmiet, ka Nongrim Hills ka sah satang lai tylli ki jingïakhun ba kan pyndep ha kane ka samoi ïalehkai ba mynta jong ka SPL, ha kaba ar tylli na kine kan dei pyrshah ïa ki artylli ki kynhun ba khlaiñ katta ïa ka Mawlai bad ïa ka Shillong Lajong FC, ha kaba dei kine ki artylli ki klob ki ban ïakhun mynta ka sngi Balang ha ka por 4:30 nohphai sngi.
