Shillong, Nailur 30
Ka Sorkar Jylla kala ai jingmynjur ïa ka song pisa ban kyrshan ïa ka Garo Hills Autonomous District Council (GHADC) ba kan siew pynkhuid ïa ki tulop ba sahteng bad ban pynthikna noh ïa ka jingsiew tulop ha ka por kaba biang sha la ki jong ki nongtrei.
Haba kren sha ki lad pathai khubor hadien ba la wai ka jingïalang jong ka Kynhun Myntri kaba la long ha ka sngi Ba-ar, u Myntri Rangbah Conrad K Sangma u la ïathuh ba ka Sorkar Jylla kan pyllait noh ïa ka ‘advance’ ba kumba T.50 klur sha ka GHADC, kata ba kynthup ïa T.24-25 klur na ka bhah khajna jong ka Council bad sa T.25 klur ban siew ïa ka tulop ba 12 bnai ba sah bad ka jingsiew tulop naduh ka 1 tarik Naiwieng.
Ïa kane ka rai la shim haba pynshong nongrim ïa ki jingai jingmut jong ka komiti bala thung hapoh ka tnat District Council Affairs, hadien ba ka sub-committee kala pynlong ïa ka jingïakren bad ka GHADC bad aiti ïa ka kaiphod dang shen.
U Myntri Rangbah u la ong, “Hadien ki jingïakren kiba bniah bad ka sub-committee bad ka jingïakren kaba bniah bad ka EC jong ka GHADC bad ruh ka jingsngewthuh ïa ki jingdonkam jong ki bad ki jingeh ba ki ïakynduh, ka Sorkar bad ka Kynhun Myntri kala rai ban pyllait ïa ka ‘advance’ ka bhah jong ka Council bad ka khajna bad da kane, kin sa lah ban siew noh ïa ka tulop ba 12 bnai ba sahteng bad kin lah ruh ban siew noh ha ka por kaba biang ïa ka tulop naduh u Naiwieng.”
“Kumba T.24-25 klur kaba ngi don kum ka bhah khajna jong ki, ka don bad ka Sorkar Jylla. Kane ka dei ka bhah ba ki dei ban ïoh ïa kaba ngin sa pyllait noh sha ki. Sa kawei ka jingpyllait ne ka advance ba T.25 klur yn donkam ban siew ïa ka tulop jong ki 12 bnai ba sahteng bad ruh ban siew ïa ka tulop ha ka 1 tarik Naiwieng,” la ong u Conrad.
U la ïathuh ba ïa kane ka pisa ka Sorkar Jylla kan sa pyllait sha ka GHADC ESCROW account ban pynthikna ba ïa kane ka pisa yn pyndonkam beit thik tang ha ka ban siew ïa ka tulop.
U Myntri Rangbah u la pynshai ruh “Kumba nga ong ba kane kam dei satia ka jingïarap lane kano-kano ka jingtuklar, kam pat shym la don eiei ba rai mynta ka sngi. Tang kawei ba ngi rai ka long ba ngi la pyllait ïa ka ‘advance’ jong ka bhah khajna ïa kaba ki dei hok ban ïoh.”
Shuh-shuh haba kylli, u Myntri Rangbah u la pyntip ba ka GHADC kala mynjur ban pdiang ïa ka jingthung ïa u Principal Secretary ha ka kyrdan u ophisar IAS ne MCS, da ka jingtyrwa ban pynlong ïa u Deputy Commissioner kum u ex-officio Principal Secretary.
Kiba bun ki nongtrei ka GHADC kiba don hapdeng 1200-1300 ngut kila soi ïa ki kot ki sla ba ki pdiang ïa ka song pisa, ïa kaba haduh 800 ngut kila aiti ruh da ka jingthoh.
Nalor kane, u Myntri Rangbah u la pyntip ba ka Sorkar Jylla kala ai jingkyrshan ïa ka GHADC da kaba pyllait ïa ka song pisa bad nang ai pisa shuh-shuh ha kine ki lai snem bala leit noh.
“Ka rai mynta kam dei satia kaba ngi leh tang mynta hynrei wat ki snem bala leit noh ruh, ngi la pyllait song pisa sha ka GHADC ba kan lah ban siew ïa ka tulop. Ha ka jingshisha ha kine ki saw snem shiteng, kumba 42 bnai ka tulop la lah ban siew bad kaba bun ka pisa ka la mih namar ba ngi pyllait shuh-shuh ïa ka pisa kum ka jingai advance sha ki,” u la ong.
