Shillong, Nailur 30
U Chief Executive Member (CEM) ba thymmai ka Khasi Hills Autonomous District Council (KHADC) u Bah Winston Tony Lyngdoh u la kren shai ba ka Voice of the People Party (VPP) ha KHADC ka kyntait ban pdiang ïa ka jingtyrwa ka Sorkar ban siew tulop hi ïa ki nongtrei jong ki Auto-nomous District Council (ADC).
Haba kren sha ki nongthoh khubor ha ka sngi ba-Ar u Bah Winston Tony Lyngdoh ula ong ba hadien ka jingïalang bad ka Sub Committee ka Sorkar Jylla, ka Council ka la dep ban ai ïa ka rai ba ka pyrshah ïa katei ka jingtyrwa ka Sorkar.
“Ka Executive Com-mittee bad ka VPP ka la kren shai ba ka pyrshah jur ïa katei ka jingtyrwa, watla ngi la dep ban ïakynduh bad ka Sub-Committee ka Sorkar Jylla, bad shen ngin sa ïakynduh biang ban pynskhem ïa ka rai kaba ngi la shim, ngi ïengskhem ha ka nongrim ba ngin ym pdiang ïa ka jingtyrwa ka Sorkar lada ka dei ha kano-kano ka rukom ruh,” la ong u Bah Tony.
U Bah Tony u la kyntu ïa ka Sorkar Jylla ba kan pyllait noh ïa ka bhah jong ka Council ban pynthikna ba ka jingtreikam kan long kaba ïaid beit ïaid ryntih, kumjuh ruh ban ai ïa ka jingïarap ba shisien ne ka Grant-in-aid ka ban pynkhlaiñ ïa ka jingdon pisa ka Council.
Shuh-shuh u la kyntu ïa ka Sorkar Jylla ban pyllait ïa ka bhah khajna jong ka Council ha ka por kaba biang ban pynthikna ba ka rukom treikam kan long kaba ïaid beit ïaid ryntih. “Ngi don ïa ka jingthmu ban ïakynduh ïa ka tnad DCA ban thaw Ïa ki lad ki lynti ha ka ban pynkhlaiñ ïa ka jingpynmih khajna jong ka council”, u la ong.
Haba bynrap u la ong, ka Sorkar lada ka don shisha ka jingsngewkhia ban kyrshan ïa ki District Council, ka dei ban pyllait noh mardor ïa ka bhah khajna jong ki, kumba ka long mynta ka jinglong jingman ka KHADC ha kaba ïadei bad ka pisa pilaiñ ka long kaba biang.
U CEM u la ong ha kaba ïadei ka jingïadei ka Sorkar Jylla bad ka KHADC ha ka jingïalam ka VPP kam long kaba bha ne kaba sniew, hynrei ka shu biang.
“Baroh ar tylli ki kynhun ki pyrshang ban ïatreilang ha kaba ïadei bad ki mat kiba kongsan, kaba pyni ka dak ka shin jong ka jingkloi ban ïatreilang. Hynrei ka Council ka la kyrpad ban pyllait ha ka por kaba biang ïa ka bhah khajna ban pyntikna ba kan ym don kano ka jingthut ha ka rukom treikam ka council, ka council mynta ka dang ap ïa ka Sorkar Jylla ba kan pyllait ïa ka pisa kaba bun sha ka council khamtam haba dep ban pynpaw ne pynsngew ïa ki jingsngew sha ka sub-committee,” ula ong.
U la ïathuh ba ha kine ki hynriew bnai ba la dep, ka EC kaba la ïalam da ka VPP ka la lah ban tehlakam ïa ki jingpynlut phut ïa ka pisa ka tyngka.
Ha kaba ïadei ka mat Uranium, u Bah Winston Lyngdoh u la ban jur ba ka nongrim jong ka Council ka long beit kumjuh kata ban ym shah ban tih ïa u Uranium uba don ha ka thaiñ.
