Shillong, Nailur 30
Ki nonghikai Adhoc hapoh ka shatri jong ka Federation of All School Teachers of Meghalaya (FASTOM) ha ka 30 Tarik u Nailur 2025, ki dang ïai bteng ban pynlong ïa ka jingïakhih, da kaba shong kyllaiñ mungor ha madan Malki.
Kane ka jingïakhih ki nonghikai ban shong kyllaiñ mungor ka dei kaba la ïaid mynta la shi taïew tam eiei.
Haba ïakren bad u Bah Sanborn Jungai, Vice President ka FASTOM u la ïathuh ba ha ka janmiet jong ka 30 tarik u Nailur 2025, ki la ïoh ïa ka phone call na u Commissioner and Secretary ka tnad pule-puthi ka Sorkar Jylla, u V.J.Mantri da kaba ïathuh ba na ka liang u Myntri Rangbah ka Jylla u Conrad K Sangma, u la khot ïa ki ban ïakren ha ka 1 tarik Risaw 2025 ha ïingsah jong u, halor kane ka jingdawa.
“Ngi kyrmen ba lashai ka sngi ka jingkhot ïakren jong u Myntri Rangbah, kan mih noh u soh uba bha, namar ka kynhun hi ka la rai ban pynneh beit ïa ki jingdawa ban kyntiew noh ïa ki skul Adhoc sha ka deficit system/deficit pattern, kaba long ban ïoh kajuh ka jingsiew kumba ïoh kiwei,” la ong u Bah Sanborn.
U la ong “Kaei kaba mih lashai ka sngi ha ka jingïakren bad u Myntri Rangbah, ngin nym shim rai tang na mangi ki nongïalam, hynrei ngin rah beit sha ki nonghikai baroh kiba don ha Malki.”
“Kum ki nonghikai kiba la ïakhih naduh kaba sdang da ka jing jai-jai bad ngi ngeit ruh ba ka Sorkar kaba long kum ka kmie u kpa, lehse ba kan sngap ïa ka jingud jingïam jong ngi,” u la ong.
“Ngi la shakri ïa ka Jylla kum ki Adhoc skul la kumba 40 snem tam eiei, ban ai ka jingshakri ïa ki khynnah kiba long ka pateng ban sa wan ruh, bad ka la dei ka por ban ïoh noh ïa ka jingsiew ka ban pynkut noh ïa kane ka jingmih surok jong ngi,” la bynrap u Bah Sanborn.
Nalor kata, u la ong “Ngim dei ki seng kaikhlaw, pan mynta ai noh mynta hynrei kaba ngi kwah ka long ba ngi dei ban ïa shai bad ka Sorkar, ba lada ka ai ïa ngi ïa kata ka jingsiew kaba biang ne ka basic pay bad kiwei pat ki jingsiew, ka Sorkar kan hap ban ai ruh da ka jingthoh.”
Lah ban kdew hangne, ba ka jingïakhih ki nonghikai kadei kaba la sdang naduh ka 22 tarik u Nailur 2025, bad namar ka Sorkar kam shym la ai kano-kano ka jingkular ban pynhun ïa ki jingdawa, kumta ki la bteng beit ïa ka jingïakhih kat haduh kine ki sngi.
