Mawkyrwat, Nailur 30
Ka Southern Border Sports Associa -tion (SBSA) ha ka sngi Ba-ar ka la plie ïa ka lympung ïalehkai phutbol ba tip kum ka 2nd Football League Tournament 2025 ha madan Balat, South West Khasi Hills District.
Ka jingthmu jong ka SBSA ban pynlong ïa kane ka lympung ïalehkai phutbol ka long kum shi bynta ban kyntiew ïa ka sap ïalehkai ki samla jong ka thaiñ khappud shathie lamsepngi jong ka South West Khasi Hills kiba dang sahdien shibun ha ka kam ïalehkai bad ka SBSA ka don ruh ïa ka thong ym tang ban kyntiew ïa ka jingïalehkai phutbol, hynrei ban kyntiew ïa ki samla ha ki jingïalehkai bapher-bapher.
Ka SBSA kum shibynta ban pynsuk bad ïa ki kynhun kiba wan ïalehkai, ka la pynlong ïa kane ka lympung ha ki lai tylli ki zone kata ha Balat zone, Ranikor bad Nongnah zone.
Ha kane ka lympung la wan ban ïashim bynta kumba 32 tylli ki kynhun bad ha kane ka sngi sdang, ka jingïalehkai ka la long hapdeng ka Umpung pyrshah ïa ka Balat, hynrei ka Balat ka la lah ban khur ïa ka jingjop ha kaba ka la pynliem noh ïa ka Umpung da 3-0 kol.
Haba phai sha kane ka jingïalehkai ka long kaba itynnad bha ha ryngkat ka jingsakhi lang ki paidbah. Ha ka kylla step, ka jingïalehkai ka la poi sha ka jingïakhaid namar baroh ar kynhun kim shym lah ban pynkhih jar bad dei ha ka kylla miet ba ka Balat ka la lah ban ïalehkai bha ha kaba ka la ïoh ban thep haduh lai kol bad pynlong ïa ka kynhun ban khur syndon ïa ka jingjop.
Ha kane ka lympung la ïadon lang u Bah Skingford Nongbri, uwei na ki riew rangbah jong ka dong ka thaiñ ha ryngkat ka jingdon lang u Bah Narayan Thongni, Secretary ka SBSA, Bah Koilan Khardewsaw, Rangbah Shnong Balat, Bah Bahun Sanglein, Bah Blosding Wanñiang, Bah Micheal Donald Lyngdoh, Chairman Football Committee ka SBSA bad kiwei-kiwei.
Haba ai jingkren ha kane ka sngi u Bah Skingford u la ai khublei kyrpang ïa ki nongpynïaid jong ka SBSA bad ïa u Bah Pius Marweiñ, MLA bad MDC ka Ranikor Constituency uba dei u President jong ka synjuk, kiba la pynlong ïa kane ka lympung na ka bynta ban kyntiew ïa ki samla donsap jong ka thaiñ ha ka kam ïalehkai bad lyngba kane ka lympung ka synjuk ha ki snem ban wan ka don ïa ka thong ba kan pynlong noh da ki Division League manla u snem.
Ka SBSA ha kane ka sngi ka la ïoh ruh ban pynkup burom kyrpang ïa ki lai ngut ki rephri jong kane ka thaiñ kiba la ïoh jingithuh na ka Meghalaya Football Association (MFA) kaba ka synjuk ka la phah pule kum shibynta ban pynshlur ïa ki samla ym tang ha ka kam ïalehkai, hynrei ban long ki nongpynïaid ruh.
Kine ki lai ngut ki long u Bah Director Syiemlieh, Bah Bansharai Thongni bad u Wilistine Marak
Ha kane ka sngi la ïoh ruh ban pynshit pynshngaiñ shuh-shuh ïa ka prokram da ki jingrwai ba sngewtynnad na i Heprit Marbianglin Sangleiñ bad ka jingshad Cultural Dance na ka seng Samla Balat bad kiwei-kiwei.
