Shillong, Nailur 30
U Bah PT Sawkmie, MLA barim ka Mawlai u la plie ïa ka Inter Dong Basketball Cum Awareness Programme on Skill Based Program ba la pynïaid da ka Seng Samla Mawlai Mawroh ryngkat ka Entrepreneurship Develop-ment Cell bad ka Community Engagement Cell, Shillong College ha madan basketball jong ka shnong ha Mawlai Mawroh ha ka sngi Saitjaiñ.
Haba ai jingkren kum u kongsan u Bah Sawkmie u la ïathuh ba la don iwei i longkmie ba la phah ïa la u khun ban ïakynduh ïa u namar ha ka por long MLA u Bah PT Sawkmie ki ju ïoh jingïarap beit haba u khun jong ka u leit ïalehkai Karate shabar Jylla, hynrei mynta ym ju ïoh eiei shuh shuh. Kumta u Bah Sawkmie u sngewkhia bha haba ïa dei bad kane ka jingeh jong ki khynnah ïalehkai ha kine ki sngi kiba mynta.
Katba na ka liang u Rangbah Shnong ka Mawlai Mawroh u Bah B.L Lyngdoh u la pyntip ba ka shnong kan sa pynlong ïa ka Winter games kaba kin sa sdang ha u Nohprah bad pynkut ha u snem thymmai.
Haba phai sha ka jingïakhun ha katei ka sngi plie, ka Mawlyndop ka la jop ïa ka Pdengshnong da 25-15 basket.
Ha kane ka inter dong ki don baroh 12 tylli ki kynhun kiba wan ïashim bynta, kynthup ïa 7 ka kynhun na ki shynrang bad 5 ka kynhun na ki kynthei.
La ïadon lang u Secretary Shnong Bah Pynsuklang Hynñiewta, Bah EP Rynjah, Bah M. Syiem bad kiwei.
