Jowai, Nailur 30
Ka Lion Sports & Youth Affairs ka la khur jingjop ha ka 1st Division Football Tournament (13th Chatister Kharkongor Memorial Trophy), hadien ba ka la pynliem noh ïa ka Lumïawmuchai Shangpung da 3-1 kol ha ka sngi Ba-ar ha Kiang Nangbah Stadium kaba ha Jowai.
Ha kane ka jingïakhun baroh ar ki kynhun ki la pyrshang ban ïakhun tyngeh. Hashwa ban kut ka kylla step ka Lion Sports & Youth Affairs ka la ïoh ban pynkhih jar nyngkong lyngba u Edius Laloo (40). Hadien saw minit ba la bteng ïa ka kylla miet, ka Lumïawmuchai Shangpung ka la pynphai lyngba u Salanbhami Suchiang. Hashwa ban wai ka Lion ka la thep biang sa ar kol lyngba u Wailaddame Niangti (82) bad u Mebanteilng Mukhim (90+2) na ka bynta ban khur syndon ïa ka jingjop.
