Shillong, Nailur 30
Haba pynskhem biang ïa ka nongrim jong ka Sorkar ban pyrshah ïa ka jingtih Uranium hapoh Meghalaya, u Myntri Rangbah ka Jylla Conrad K Sangma ha ka sngi Ba-ar u la ai ka jingkular ba un ïakren bad ka Sorkar Pdeng halor ka Office Memorandum (OM) ba pynmih dang shen da ka Ministry of Environ-ment, Forest and Climate Change (MoEFCC) hadien ynda la dep ban bishar bha ïa ka jingshong aiñ jong ka.
Ka Office Memoran-dum, kaba tyrwa ban nym pynlong shuh ïa ka jingïasyllok paidbah bad ka public hearing ïa ki projek tih par ba dei jong ki atomic mineral kum u Uranium, kala pynsngewkhia jur bha hapdeng ki nongshong shnong namar kine ki kam ki long kongsan bha ïa ka Environmental Impact Assessment (EIA).
“Kum ka Sorkar ngi la kren shai bha ïa ka nongrim ba ki briew jong ngi bad ki kynhun bapher-bapher, bad wat ka Sorkar ruh kam kwah satia ban tih uranium ha Jylla. Ngi la kren shai bha ïa kane bad ngi la kren haba shit haba shai ïa kane ka mat bad nga kren biang mynta haba shit haba shai,” ong u Conrad haba kren sha ki lad pathai khubor ha ka sngi Ba-ar.
U Myntri Rangbah u la pynpaw ïa ka jingsngewkhia kaba jur halor kane ka jingpynbna (notification), haba pynpaw ba watla um pat shong bishar ïa kaei kaba don ha kane ka OM, kane ka kam ka donkam ïa ka jingbishar ba bniah katkum ki lynti jong ka aiñ.
“Haba pynshong nongrim na kaei kaba ngi lap, ngin sa pan jingpynshai na ka Sorkar Pdeng haba donkam bad ngan sa ïakren ruh bad ka Sorkar Pdeng ha ki kyrdan bapher-bapher bad pynthikna ïa ka jingïada ïa ka bha ka miat ki briew jong ngi,” u la kular.
“Kumta, ka dei ka jingbahkhlieh jong ka Sorkar bad lada ngi shem hangno-hangno ba ki don ki aiñ lane ki jingpynbna kiba ïaid pyrshah ïa ka bha ka miat ki briew jong ngi, ka dei ka kamram jong ka Sorkar ban ïakren ïa kane ka kam bad ka Sorkar Pdeng bad nga kular ha phi bad nga kular ïa ki paidbah ka Jylla ba ngin ïa ïeng ryngkat bad ki paidbah ha kane ka kam,” u la bynrap.
