Shillong, Nailur 30
Ka ‘Shillong Vidyalaya’ ka la rakhe ïa ka jingdap 75 snem jong ka da ki jingïakop bapher-bapher hapdeng ki skul ha ka 25 tarik u Nailur, 2025.
Ki jingïakop ki kynthup ha ka liang ka ‘Elocution’, jingïathuh khana, bad ki jingïa-tyrko nia, ba la kyrshan da ka ‘NESkills’.
Ha ka ‘Elocution’ (klas 6-8), ka Catherine Shadap jong ka Lumparing Vidyapith Secondary School ka la ïoh rah ïa ka nam lahduh, bud sa u Deibormi G. Myrthong na ka Dainty Buds Secondary School ha ka kyrdan kaba ar, katba ka Starryna Teronpi na Rilbong P.N. Choudhuri H.S. School ka la wan ha ka kyrdan kaba lai.
Haba phai pat sha ka jingïathuhkhana na ka bynta ki klas 9-10, u Buhbhami Shylla jong ka Shillong Vidyalaya Secondary School u la rah ïa ka kyrdan banyngkong, katba u Shaniahskhem Phalangki na Shillong Vidyalaya Secondary School u la wan ba-ar. U Daniel Shabong jong ka Dainty Buds Secondary School u la wan ha ka kyrdan kaba lai.
Ha ka jingïakop tyrko nia na ka bynta ki klas 9-10, u Anesh Das & Ebyntami Shylla – Shillong Vidyalaya Secondary School ki la ïoh rah ïa ka nam lahduh, ka Dioni Ch. Marak & Simran Kumari na Shishu Mandir Secondary School ki la wan ba-ar.
Na ka liang u Dr. Sujoy Hazarika (President, Managing Committee) bad ka Headmistress ki la ai khublei ïa ki skul kiba la ïashim bynta bad pynshlur ïa ki khynnah skul ban ïaid shakhmat ha ka pule-puthi.
