Khliehriat, Nailur 30
Ka Rymbai Synrangshahkhaiñ SC ka la jam sha ka semi final ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA).
Kane ka la wan hadien ba ka la pynliem noh ïa ka Rymbai Wahshnong SC da 3-0 kol ha ka jingïalehkai quarter final kaba la long ha ka sngi Ba-ar ha madan artificial turf Diengshynrum kaba ha Khliehriat.
Kumba ka paw na kane ka jingïakhun ka Rymbai Synrangshahkhaiñ ka la long ka kynhun kaba khlaiñ bor ha ka la ïoh ban pynkhihjar nyngkong eh ha ka kylla step lyngba u Lalgugin Latjem ha ka minit kaba 28. Kane ka kynhun ka la pynbud biang sa ar kol ha ka kylla miet lyngba u Ferdinand Nongtdu ha ka minit kaba 84 bad u Seigaohao Dimngel (90+6) na ka bynta ban khur syndon ïa ka jingjop.
