Shillong, Nailur 30
Ki kam thok kam shukor ban pynbiej bad pynngop ïa ki riew paidbah lyngba ki kor mobile phone ki dang ïai bteng ban ïoh khlong ei ïa ka pisa kaba dei ka umsyep kaba la kamai shitom.
Katkum ka khubor na ki pulit la ong ba kawei ka longkmie kaba dei ka nongshong shnong jong kawei na ki Dong kaba don ha South West Khasi Hills ka la ai ka jingujor ba uwei u briew bym lah ban ithuh uba la kam ïa lade kum u nongmihkhmat jong kawei ka kompeni, u la lah ban pynkohnguh ïa ka ban thep pisa (invest) da kaba kular ba kan ïoh pat ïa ka pisa kaba heh, ïa kane katei ka longkmie ruh ka la kohnguh bad thep pisa kaba long haduh T.2.38 lak.
Hynrei la ong ba kham hadien, kane ka nongujor ka la sngewthuh ba ka la shah thok.
Ha kawei pat ka khubor, uwei u nongshong shnong jong ka dong ha nongbah Shillong u la ai ka jingujor ba ha ka 22 bad 23 tarik mynta u bnai, u la ïoh pdiang ïa ka phone call na u briew bym ithuh, ha kaba une u nongphone u la pynithuh ïa lade kum u nongtrei jong ka SBI Yono.
La ong ba haba u la pynithuh ïa lade, une u briew u la pyntip ba ïa ka ram (loan) kaba long T.1.5 lak la dep ban pyllait na SBI Yono bad pyntip shuh-shuh ban plie ïa ka ‘health insurance’ bad ka bank da kaba siew T.5572, khnang ban lah ban ïoh ïa kane ka ram, ha kaba une u rangbah ruh u la kohnguh.
Kham hadien, une u nongujor u la lap ba ym shym la don satia ba phone napoh ka Bank bad ruh ba ïa ki jingtip ba pura jong ka bank jong u, ba kynthup ïa u phone number ba la register bad ka SBI Yono la dep ban pynkylla lut.
