Shillong, Nailur 30
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki ar shaka bad kiwei ki kam tuh na kylleng ki jaka.
Katkum ka khubor kaba la ïoh na ki pulit la ong ba ha ka 29 tarik mynta u bnai ha ka por kumba 1.42 mynsngi, u Suzan Ghosh u la ujor da ka ktien ba ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-X-6645 na Zikzak Road, Rilbong, Shillong.
U Bah Victorious Lyngdoh ruh u la ai ka jingujor ba ha ka step jong ka 28 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-W-8823 na ka thaiñ Lumshatsngi, Shillong.
Ha kawei pat ka khubor, la ong ba ha ka 27 tarik mynta u bnai, ki shipai BSF kiba don ha Lyngkhat BOP ha East Khasi Hills ki la lap noh ïa kawei ka arshaka (AS-22G-8855) kaba la suba shah tuh na kawei ka khlaw kaba hap hapoh ka thanad Pynursla.
Na ka liang jong u Sekender Ali u la ai ka jingujor ba ha ka 23 tarik mynta u bnai, uwei u runar bym lah ban ithuh uba la tap durkhmat, u la tuh ïa ka arshaka ka jong u, kaba don ïa u registration number ML05-K-4387 na ka thaiñ Babupara ha West Garo Hills.
Ka khubor ki pulit ka ïathuh ba ha ka 27 tarik mynta u bnai, ha ka por kumba 4.30 mynstep, ki runar bym lah ban ithuh ki la tuh ïa kawei ka arshaka kaba don ïa u registration number ML05-6731 na ka thaiñ Nongthymmai, Shillong.
U Islife Malang u la ai ka jingujor sha ki pulit ba ha ka 11 tarik mynta u bnai, u la lap ba ki runar bym lah ban ithuh, ki la tuh ïa uwei u Remote Radio Unit (RRU) na ka tower jong ka Airtel kaba don ha ka shnong Mustem ha West Jaiñtia Hills.
Kumjuh ruh na ka liang jong u Bah Neil Gordon Lyndem u la ai ka jingujor ba ha ka 25 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-T-8032 na ka phyllaw jong ka jaka sah ka jong u, kaba don ha Jaiaw Lumpyllon, Shillong.
