Shillong, Nailur 30
U Bah Winston Tony Lyngdoh, MDC ka Voice of the People Party na Nongthymmai, u la shah jied kum u Chief Executive Member (CEM) ba thymmai ka Khasi Hills Autonomous Dis-trict Council (KHADC) khlem don mano-mano ba ïakhun pyrshah.
La pynlong ïa ka ilekshon CEM dei namar ka jingiehnoh kam u Bah Shemborlang Rynjah namar ba u don hapdeng ka jingshitom ha ka met. Ha kane ka ilekshon CEM ka liang pyrshah ka khlem sei kyrtong satia ban ïakhun.
Ïa u Bah Winston Tony Lyngdoh la pynbna kum u CEM ba thymmai da u Shongknor ka KHADC, Bah Strong Pillar Kharjana ha ka Dorbar Kyrpang jong ka Council ba long ha ka sngi Ba-ar.
U Bah Strong u la shah ïa ki dkhot ka ïingdorbar ban ai ki kyntien khublei ïa u CEM ba thymmai ha kaba kiba shim bynta ha ka jingaikhublei ki kynthup ïa u Bah Titosstarwell Chyne u ba long ruh nongïalam ka liang pyrshah, u Bah Powell Sohklet, u Bah Ricky Shullai, u Bah Srally Rashir, ka Kong Rona Khymdeit, ka Kong Deiti H Majaw, ka Kong Aibandaplin Lyngdoh, u Bah Seibor Rynjah, u Bah Mathew K Makdoh bad kiwei-kiwei.
U Bah Strong u la ong ba u sngewskhem ïa u nongïalam ba thymmai ka Council bad u kyrmen ba ha ka jingïalam u Bah Tony ka Council kan ïoh ïa ka Executive Committee kaba khlaiñ bad ba skhem ka ban buh hakhmat ïa ka bha ka miat u paidbah.
U Bah Tony haba ai jingkren kum u CEM ba thymmai u la pynpaw ka jingsngewnguh ïa ki dkhot bad ki MDC ka liang ïatei, ba ki ai ka jingshaniah bad ba la bynshet ha u ïa kane ka kam.
U la pynpaw ka jingsngew bynnud ïa ka jingiehnohkam noh u CEM barim u Bah Shemborlang Rynjah, namar ka jingbym khlaiñ ka met ka phad, namar u long u briew u ba don ka jingshemphang, ka jingstad ha ka ban pynïaid ïa ki kam, u la ai ka jingkitbok kitrwiang ba un ïoh noh ka jingkoit jingkhiah bad ba un lah biang ban wanphai sha ka kamram ba u paidbah u la jied.
U Bah Tony u la ai khublei ïa ki MDC ka liang synshar, u nongïalam ka liang pyrshah bad ki dkhot ka ïingdorbar ïa ka jingkitbok ïa u, kumjuh ïa ka VPP ka ba la jied ïa u ban long kum u CEM bad ïa ki paidbah ka Nongthymmai Constituency kiba la jied ïa u kum u MDC.
