Shillong, Nailur 30
U Myntri Rangbah ka Jylla, Conrad K Sangma haba pynpaw ïa ka jingsngewnguh, u la ai khublei ïa u Bah DP Wahlang, uba la shongthait noh na ka kam Chief Secretary ka Jylla hadien ka jingaiti ban shakri haduh 32 snem ïa ka Jylla Meghalaya.
Ha ka jingïalang ka Kynhun Myntri kaba la long ha ka sngi Ba-ar, u Conrad u la pynpaw ïa ka jingsngewnguh kaba khraw ïa u Bah DP Wahlang halor ka jingai jingshakri naduh ka mynsiem ïa ka Jylla.
U Conrad u la ïaroh ïa ki synñiang jong u Bah Wahlang sha ka Jylla, haba kubur ïa ki jingpyrshang ba khlem thait bad ka jingaiti lut ïalade ha ka jingshakri ïa u paidbah.
Na ka bynta ka Kynhun Myntri, ka Sorkar, ki Nongtrei bad ki paidbah ka Meghalaya, u Myntri Rangbah u la pynpaw ïa ka jingsngewnguh naduh ka mynsiem ïa u Bah Wahlang namar ka jinglen lade ha ka jingshakri.
“U Bah Wahlang u la shongthait noh ha ka sngi Ba-ar, kata hadien ba u la ai 32 snem ka jingshakri ïa ka Jylla bad ïa ki paidbah bad kane ka jingïalang ka Kynhun Myntri ruh ka la dei kaba khatduh eh jong u bad nga kwah ban buh ha ka jingthoh ïa ka jingïaroh bad jingsngewnguh ïa u namar ka jingshakri ba u la ai ïa ka Jylla Meghalaya,” ong u Conrad.
