Shillong, Nailur 30
Ka Sorkar Jylla ka la rai ban pynkut noh ïa ka jingïa-ka-jia jaka kaba la neh da ki phew snem da kaba aiti ïa ka jaka kaba heh 128 akar ha Saitsohpen, Sohra Civil Sub-Division sha ka Elaka jong ka Hima Sohra.
Haba pynbna ïa kane hadien ka jingïalang jong ka Kynhun Myntri ha ka Sngi Ba-ar, u Myntri Rangbah ka Jylla, u Conrad K. Sangma u la ong ba ka Kynhun Myntri ka la mynjur ïa ki jingai jingmut jong ka komiti ba la khlieh da u Symbud Myntri Rangbah ka Jylla, u Bah Prestone Tynsong, kaba la ïakren bad ki nongshim bynta la palat shisnem shiteng ban wad ïa ka lad ban weng noh shi syndon ïa kane ka jingeh.
“Kumba 128 akar ka jaka yn aiti sha ka Elaka, katba kaba sah, kan neh bad ka tnad Government Administrative Department (GAD) bad ka Sorkar Jylla,” u la ong haba ïakren bad ki nongthoh khubor.
Kane ka jingïa-ka-jia ka la sdang naduh ka por jong ki Phareng, ha kaba ka Elaka ka kam ïa ka jinglong trai ïa kane ka jaka katkum ki jingthoh histori bad ka jingshong shnong.
“Ki don katto-katne ki jaka kiba la shong da ki nongshong shnong bad da ka Elaka baroh kawei la bun phew snem wat hashuwa ban ïoh ïa ka Jylla lajong bad ha ka jingshisha kiba bun na ki, naduh ka por Phareng. Namarkata, da kaba pynshong nongrim ïa kine ki jingthoh baroh, ka la don ka jingïakren bad ka Elaka bad ngi la poi sha ka jingkut jingmut…,” ong u Sangma.
“Da kane ka rai, kane ka jingïakynad bad ka jingeh kaba la slem bah hapdeng ka Elaka bad ka tnad GAD, kyrmen kumba nga la ong, yn sa pynbeit noh. Shisien ba la shim ïa kane ka rai jong ka Kynhun Myntri bad mynta, kin sa leit sha ka jingïateh kular kaba pura bad ki nongshim bynta – bad kin ïaid shakhmat bad ka jingpynbeit kaba neh na ka bynta kane ka jingeh kaba la sahteng la slem bah,” u la bynrap shuh-shuh.
