Shillong, Nailur 30
U Myntri Rangbah ka Jylla, u Conrad K. Sangma, u la pyntikna ban khmih bniah ïa ka jingdawa jong ki nonghikai ‘Adhoc’ hapoh ka lama jong ka Federation of Adhoc School Teachers of Meghalaya (FASTOM), kiba la pynlong ïa ka jingïakhih shong kyllaiñ mungor kaba khlem buh por ha kine ki 9 sngi ba la dep, da kaba dawa ban kyntiew kyrdan ‘Deficit’ ïa ki skul ‘Adhoc’.
Haba kren sha ki nongthoh khubor ha ka Sngi Ba-ar, u Sangma u la pynshai ba ka mat jong ki nonghikai ‘Adhoc’ ka long kaba pher na kiwei pat ki kynhun, naba ki ïoh pdiang ïa ka tulop jong ki ha ka por kaba biang, watla ka don ka jingpynslem kaba teng-teng. Ka jingsngewkhia kaba kongsan jong ki nonghikai ‘Adhoc’ ka long ban pynkiew ïa ka song tulop jong ki.
Ka Sorkar ka dang bishar bniah ïa kane ka jingdawa, da kaba buh jingmut ïa ki jingktah kiba ïar ïa kiwei pat ki kynhun nonghikai, kum ki SSA bad ki nonghikai skul ‘Adhoc’.
U Myntri Rangbah u la kdew ba ka jingmynjur ïa ki jingdawa jong kawei ka kynhun ka lah ban don ka jingktah kaba jngai ïa kiwei pat ki kynhun. Kumta ka Sorkar ka donkam ban bishar bniah ïa baroh ki liang hashuwa ban shim ïa ka rai.
“Ka Sorkar ka dang khmih bniah ïa kine ki bynta baroh namar kine baroh ki don jingïadei. Shisien ba ngi la mynjur ban pynkiew ïa kawei ka kynhun nonghikai, shu buh ka SSA, kata ngi don ruh ïa ki nonghikai skul ‘Adhoc’ lem bad kiwei-kiwei ki kynhun kiba don hangta. Kumta, ngi donkam ban peit bniah ïa baroh kiwei pat ki bynta bad nangta ngin sa shim ïa ka rai. Namarkata, kane ka long kaba kham kyllaiñ naba ka don ïa ka jingktah kaba kham heh bad ngi hap ban peit bniah ïa ka.”
U Sangma u la pyntikna ba ka Sorkar ka tip bha ïa ki jingeh jong baroh ki kynhun hynrei ka hap ban pynïabiang ïa kine ki jingdawa bad ki jingeh kiba ka ïakynduh.
“Hooid, baroh ki don ki jingsngewkhia bad ki jingsngewkhia jong baroh ki long kiba shisha. Ngam kyntait ïa kata hynrei ngi hap ruh ban peit ïa ki jingduna kiba ngi don bad khmih kumno ngin ïaid shakhmat haba ïadei bad kine kiei-kiei,” u la ong da kaba kdew shai ba ka jubab jong ka Sorkar ïa ka jingdawa jong ki nonghikai ‘Adhoc’ kam dei shaphang ka jingïarap ne “bailing out” ïano-ïano hynrei ka dei shaphang ka jingpynbeit ïa ki jingsngewkhia hapoh ka jinglah jong ka Sorkar.
