Shillong, Risaw 01
U Myntri Rangbah ka Jylla, u Conrad K. Sangma ha ka Sngi Balang u la khot ïakren ïa ki nonghikai skul ‘Ad-hoc’ kiba don hapdeng ka jingïakhih, hadien ba kane ka jingïakhih shong kyllaiñ mungor jong ki (ba khlem buh por) ka la kynjoh sha ka 10 sngi bad kaba la neh kumba 240 kynta.
Ki nongïalam ka Federation of All School Teachers of Meghalaya (FASTOM) ki la leit ban ïashim bynta ha kane ka jingïalang ba la pynïaid da u Sangma ha ïingsah jong u.
Hynrei ym pat lah ban tip kaei kaba la mih na katei ka jingïalang haduh mynta.
Na ka liang ki nongïalam ka FASTOM ki la pynpaw ba kin ap shuwa ïa ki ‘Minutes’ jong ka jingïalang hashuwa ban rai ïa ka lynti treikam kaba hadien jong ki, kaba la buh ban pynbna ha ka Sngi Palei.
Ki nonghikai ‘Adhoc’ ki la dawa ban kyntiew kyrdan ‘Deficit’ ïa baroh ki skul ‘Adhoc’ hapoh ka Jylla.
