Shillong, Risaw 01
U Myntri Rangbah ka Jylla, u Conrad K. Sangma ha ka Sngi Balang u la ïashim bynta ha ka jingïalang pynkut ïa ka jingrakhe jubili ksiar jong ka Little Flower Higher Secondary School (LFHSS), Mawbri kum u Kongsan.
Kane ka prokram ka long ruh shi bynta ban kynmaw burom ïa ka jingdap 50 snem ka jingshakri jong kane ka shlem sha ka pule-puthi kaba don ïa ka ‘tien phira, “Darkness to Light”.
Ha ka jingkren jong u, u Myntri Rangbah u la ai khublei ïa ka skul kaba la pyndep ïa sanphew snem ka jingshakri kaba aiti lut bad ai khublei ruh ïa ki jingnoh synñiang jong ki nongpynïaid, ki nonghikai, ki khynnah pule barim, bad ka Balang Katholik ha ka ban pynwandur ïa ki khynnah skul pateng-la-pateng.
U la pynpaw ruh ïa ka jingbei tyngka jong ka Sorkar ha ki jingtei skul, ki jingai jingïarap sha ki skul shimet, bad ki jingpyrshang ban pynkhlaiñ ïa ka jingkyrshan sha ki nonghikai.
Ha kajuh ka por, u Myntri Rangbah u la pynbna ïa ka jingnoh synñiang banyngkong kaba T.25 lak na ka Chief Minister’s Special Development Fund (CMSDF) haba ïadei bad ka projek ban tei thymmai ïa ka ïingmala jong ka skul.
U Symbud Kongsan, u Bah Damanbait Lamare, MLA ka Umroi konstitwensi, u la ai ka jingïaroh ïa ka skul halor ka jingnoh synñiang jong ka sha ka roi ka par jong ka pule-puthi bad ka kolshor jong ka Ri-Bhoi bad ai mynsiem ruh ïa ki khynnah skul bad ki nonghikai ba kin ïai bteng ban ïakhun tyngeh ban long kiba tbit.
Ka bynta kaba kongsan jong kane ka jingrakhe ka long ka jingpule ïa ka jingïateh kular (MoU), ha kaba ka skul ka la batai ïa ki jingthmu jong ka – ban pynïar ïa ki jingtei, ban wanrah ïa ka laiñ pule Science, Commerce, bad Arts, bad ban pynbiang ïa ki jinghikai ha ka liang ka jingpule ‘Co-curricular’ bad ‘Recreational’.
Ka MoU ka pan jingkyrshan ruh na u Myntri Rangbah ka Jylla na ka bynta ka jingïarap pisa ban pynurlong ïa ka projek thymmai haba ïadei bad ka ïingmala.
Ha kane ka prokram la don ruh ki jingpyninam ïa ka kolshor, ki jingkren na ki khynnah skul barim, ka jingpynkup burom ïa ki nonghikai ba la shongthait bad ki khynnah kiba la leh bha ha ki eksamin, ka jingpyllait ïa ka ‘Souvenir’ jong ka skul, bad ka jingpyllait paidbah ïa ka kot ba la thoh da ka Dr. Mistilia Dkhar.
La pynkut ïa kane ka jingrakhe da kaba pynhiar ïa ka lama Jubili, ka jingkren ai khublei na ka liang Headmistress, Rev. Sr. Anyiele Richa, bad ka jingplie ïa ki kamra klas bathymmai.
Ha kane ka sngi pynkut, la don lang ruh ki khynnah pule, ki khynnah pule barim, ki nonghikai, ki kmie ki kpa, bad ki nongshong shnong kiba la ïasnohkti lang ha ka ban rakhe ïa ka jingïaid lynti kaba 50 snem jong ka Little Flower Higher Secondary School, Mawbri.
