Shillong, Risaw 01
U Myntri Rangbah ka Jylla, u Conrad K. Sangma u la ong ba ka Sorkar jong u ka la buh hakhmat eh ïa ka mat haba ïadei bad ka jingmihkhmat jong ki longkmie ha ka Kynhun Myntri ha ka kylla banyngkong jong ka samoi treikam bad ka hap ban pyrkhat ruh ïa ki jingangnud jong ki thaiñ ha ka kylla ba-ar jong ka samoi treikam.
Haba kren sha ki lad pathai khubor ha ka Sngi Ba-ar, u Sangma u la batai ba ka rukom thaw ïa ka Kynhun Myntri ka kynthup ïa ka jingpynïabiang ïa ki bynta bapher-bapher, kynthup ïa ka jingmihkhmat ha ki thaiñ bad ka jingpynkupbor ïa ki kynthei.
“Ka paw shai, ba lada nga don 20 tylli ki jaka na bynta ki Myntri Sorkar te hooid, nga long laitluid bad nga lah ban kynthup ïa kita ki bynta baroh hynrei ki don ruh ki jingpyrkhing. Ngi la hap ban pynïabiang lang ïa ki jingangnud bapher-bapher, kiba long kongsan lang mar katjuh. Ka jingmihkhmat jong ki kynthei ka long kaba kongsan na ka bynta jong ngi, bad dei na kata ka daw ba ha ka kylla sdang jong ka Kynhun Myntri, ngi la pyntikna ba ngi la ai ïa ka jingmihkhmat hangta,” u la ong.
Haba jubab ïa ki jingkylli halor ka jingsam ïa ki kyrdan sha ka Kynhun Myntri, u Sangma u la kdew ba ki jinglong-jingman ha ka saiñ pyrthei ha ka por ba thaw ïa ka Kynhun Synrop ki long kiba pher. U la ban jur ba ka kyrdan Myntri Rangbah ka Jylla, dei kaba la jied katkum ka rukom synshar paidbah da ki MLA jong ka Kynhun Synrop ne seng kaba synshar, bad ka jingshim rai ka kynthup ïa ki nongmihkhmat ba la jied da ki paidbah.
“Ka kyrdan jong u Myntri Rangbah ka dei kaei-kaei kaba la jied katkum ka rukom synshar paidbah da ki MLA jong ka Kynhun Synrop jong ka seng ba synshar bad kumta ngi la ïaid shakhmat bad ka jingjied ïa ki nongïalam jong ka Sorkar MDA ha kata ka por. Kumta, ka dei kaba la ïa mynjur lang, ka dei ka rai ba la shim da ki nongmihkhmat ba la jied da ki paidbah bad kata ka dei ka rukom kaba ngi bud,” u la ong.
Ha kaba ïadei bad ki jingpynsngew ba dang shen jong ka Dr. Ampareen Lyngdoh, kawei na ki 8 ngut ki Myntri kaba la shah weng ha ka jingbujli shuki Myntri, u Sangma u la pynshai ba la phah ïa ki shithi sha baroh ki Myntri kiba don bynta, kynthup ïa ki Myntri ka NPP, ha ka 12 tarik u Nailur, ha kaba la batai bniah halor ka jingbujli shuki Myntri. U la pyntikna ba baroh ki Myntri ki la ïoh pdiang ïa ki shithi bad ki tip ïa ka rukom treikam kaba bud.
“Kumta, ka jingkylli ba khlem pynsngew ne bym shym la pyntip, kam mih. Ha ki shithi ka la kham bha shibun namarba la kdew ïa baroh ki jingtip ba bniah. Ngam shym la ïasam ïa ki shithi sha ki lad pathai khubor, bad lada donkam, ngi lah ban ïasam ïa kata ka shithi ruh hynrei ïa kane ka kam la leh bad baroh ki la ïoh ïa ki shithi,” u la pynpaw shuh-shuh.
