Shillong, Risaw 01
Ki Kynhun sengbhalang kiba kynthup ka Khasi Student Union (KSU) bad Federation of Khasi Jaintia & Garo People (FKJGP) ki la dawa na ka Sorkar ban shimkhia halor ka jingïakhih ki nonghikai Ad-hoc kiba don hapoh ka shatri ka Federation of All School Teachers of Meghalaya (FASTOM).
U President ka Khasi Student Union (KSU) u Bah Lambokstarwell Marngar, u la ong ba ka jingdawa ki nonghikai kiba don hapoh ka shatri jong ka Federation of All School Teachers of Meghalaya (FASTOM) ka long kaba shongñia namar ki nonghikai ki dei ki païa ban saiñdur ïa ka lawei ki khynnah bad ki khun samla.
U Bah Lambokstar-well u la ong, “Ngi sngewthuh ba ki nonghikai ki dei ki païa ban saiñdur ïa ka lawei ki khynnah bad ki khun samla, lada ym don ki nonghikai ngin nym ïoh ruh ïa kita ki nongthaw aiñ kiba shong hapoh secretariat.”
“Na ka por sha ka por la ïohi ïa ka jingeh ki nonghikai bad ka KSU ruh ka la ju pynsngew sha ka Sorkar ba ka la dei ka por ïa ka Sorkar ba kan pynbeit thymmai noh ïa kine baroh ki jingeh ki nonghikai, namar kumba ka long mynta, ha ka jaka ba ki nonghikai kin pynlut por khambun ha ki kamra klas ban sam jingtip ïa ki khynnah, ki hap mih madan pynban ban pynsngew sha ka sorkar ïa ka jingeh bad kane ka long ka jinglehraiñ ïa ka Sorkar,” la ong Bah Lambok.
U Bah Lambok u la ong, “ym lah ban tip ïa ka jingïakren hapdeng ki nongïalam ka FASTOM bad u Myntri Rangbah hynrei na ka liang ka KSU kan don ha syndah ha kano-kano ka por ruh.”
U la ong ruh ba haduh katno ki kynduh jingeh ym lah ban tip hynrei ki nonghikai hi ki tip khambha, bad lah ban sngewthuh ba ka jingeh ki nonghikai ka long na ka por sha ka por ba ki hap ban mih madan ban dawa na ka Sorkar.
Shuh-shuh u Bah Lambok u la ong, ka pule puthi ha ka Jylla kan kiew bha lada dei ba ka Sorkar Jylla ka shimkhia, hynrei lada ka long kumba ka long mynta kan dang hiar arsut bad ka Sorkar ka la dei ban thaw ki lad ki lynti ban pynbeit noh ïa kine ki jingeh ba ki nonghikai ki la buh na ka por sha ka por ha khmat ka Sorkar.
“Shisien san snem ki wan tied jingkhang ïa u paidbah, hynrei mynta ka la dei ka kamram jong ki ba kin pynurlong ïa ka jingeh ki paidbah ba ha baroh ki liang,” la ong u Bah Lambok.
U la bynrap ruh ïa ka rukom long rukom man, ba lada kita ki nongthaw aiñ ki shim ïa ka shisien san snem kum ka jingleh tamasa, ka jinghiar arsut jong ka Jylla ha baroh ki liang yn sa sakhi nangne shakhmat.
Ka Federation of Khasi Jaintia & Garo people (FKJGP) ka pynpaw ka jingsngewkhia ba ki seng saiñ hima ha ka por ilekshon ki kren ban pynbha ïa ka pule puthi ha ka Jylla hynrei ki nonghikai na ka por sha ka por ki hap ban mih madan, “Ka Sorkar ka don pisa ban pynlut ha ki kam tamasa katba kam thaw pat ïa ki sienjam ban weng ïa ki jingeh ki nonghikai.”
U Bah Kitboklang Nongphlang Vice president ka Federation of Khasi Jaintia & Garo People (FKJGP), u la ong ba ka Sorkar ka don pisa ban thung ïa kita ki ‘consultant’ bapher-bapher ha man ki tnad treikam kumta kan eh aiu ban siew tulop ki nonghikai kiba dei u budlum ïa ki khynnah pule.
Lah ban kdew ba u Myntri Rangbah ka Jylla u Conrad Sangma ha ka 1 tarik Risaw u la khot ïakren ïa ki nongïalam jong ka FASTOM ha ïingsah jong u ban ïa thir ïatai sani ïa ki jingdawa jong ki, ki nonghikai ki dang bteng ïa ka jingïakhih jong ki ha madan Malki bad ki dang ap ïa ka rai ka jingïakren ka ban mih na katei ka jingïakynduh ki nongïalam bad u Myntri Rangbah.
