Shillong, Risaw 01
Ka HNYF Southern Border Area kaba hap ha Mawsynram Block, East Khasi Hills District ka la bitar namar ki trok kit coke ki khlem burom ïa ka jingmana namar ki dang kit palat pud haba ki ïaid na jingkieng Umpung kaba ïaid najrong ka wah Umngi.
U Bah Kyllang Thongni uba dei u President ka HNYF Southern Border Area u la ong, lada ki trok kim burom ïa ka jingmana, ka seng kam don ka jingkitkhlieh lada ki paidbah ki la bitar ïa kine ki trok namar ka jingsniew palat ka surok naduh jingkieng Umpung, Balat shaduh Mawsynram kaba la buh jingeh ïa ki paidbah nongleit nongwan. U la ong ba ka seng kam pyrshah ïa ka jingkit coke ban ïaid na kane ka surok hynrei ka pyrshah ba la kit palat pud haduh ba ka buh jingma ïa ka jingkieng bad sniew ka surok. Shuh-shuh u la ïathuh ba kine ki trok kit coke ki wan na Nongjri, South West Khasi Hills ban leit buh sha ki thaiñ Byrnihat.
U la pynkynmaw ba ka seng ka la pynmih jingmaham naduh ka 22 tarik Nailur 2025 ban nym shah ïa ki trok ban ïaid palat pud ha jingkieng Umpung hynrei haba ka seng ka la khang la wan ki pulit bad la pynbeit ban jurip ïa kane ka surok bad ïa ka jingkieng ha jingïadonlang ka ophis DC, PWD, BDO bad ki pulit.
U Bah Kyllang u la ong ba ka Sorkar kan sa siangrong noh na jingkieng Umpung shaduh Ladbakli lyngba ka skhim PMGSY te lada dang ïaid ki trok kit palat pud kane ka surok kan nym neh slem.
U la ban biang ba lada kine ki trok ki dang pyni bor ban ïaid palat pud ka seng kam don jingkitkhlieh lada ki paidbah ki la bitar ha kawei ka sngi namar ha ka shi sngi ki ïaid palat 50 tylli. Kumta u la kyrpad ïa ki trai trok, trai coke ba kin sngewthuh lem ïa ka jingsniew ka surok namar kane ka buh jingeh ïa ki paidbah kiba leit ba wan khamtam haba pang ba shitom.
