Cebu, Risaw:
Katkum ki khubor, la ong ba ka jingdon kiba khlad na ka jingkhynñiuh u jumai uba jur hapdeng jong ka Philippines, ka la kot ia ka 60 ngut tad haduh jong ka step Sngi Balang ba la ioh ia ka jingkheiñ ba khatduh, ha kaba kitei kiba ngat ha katei ka jingjia ba sniewbok ki la shah pynkit lut sha ki hospital ba pher jong ka Cebu, katba ki nongtrei, ki la kit da ki phew tylli ki pla metïap, ha ka jingkulmar hadien katei ka jingjia.
Ka tnat US Geological Survey (USGS) ka la iathuh ba kane ka jingkhynñiuh jong utei u jumai uba la don kumba 6.9 ka jingkhlaiñ, ka la jia ha ka por 9:59 baje jong ka step Sngi Ba-ar, ha ka thaiñ Shatei jong katei ka dewlynnong, hajan ka nongbah Bogo, kaba don ia kumba 90,000 tam ki paid nongshong shnong.
Ki khynnah kiba la mynsaw ki la shu iam da ka jingsyier bad jingsheptieng bad ki rangbah ki la lynñiar bad kyrthat katba ki dang shah sumar ha ki jaka sumar ba la pynthiah ia ki hapoh ki ïingjaiñ ha ka lynti ïaid kali jong ka Cebu Provincial Hospital ha Bogo.
Namar la shu pynher krad ia ki shabar na ki iing mala ba ki shong- ki sah hapdeng ka jingtieng ba ki lah ban shah ktah shuh shuh namar ba da ki spah tylli ki jingkhynñiuh jumai, la sakhi da katei ka thaiñ tang hapoh jong ka shi miet.
Hajan katei ka jaka, ki nongtrei jong ka hospital, ki la rah ia ki pla met kiba lieh ha ki jingkit sha ki kali van ki ban leit rah ia ki sha ki jaka tep ia ki met iap, katkum ki khubor bad ki dur ba la pynsaphriang da ki nongthoh khubor.
Kumta la ong ba haduh 60 ngut ki briew ki la shu khlad bad duh ei noh ia ka jingim tad haduh jong ka step Sngi Balang ba la ioh ia ka jingkheiñ ba thymmai, la iathuh u Deputy Administrator jong ka tnat Civil Defence, u Rafaelito Alejandro.
Ka National Disaster Risk Reduktion & Management Council kham hashwa ka la buh jingkheiñ ïa ki 147 ngut kiba la ngat bad mynsaw ha kylleng ki bynta jong katei ka thaiñ bad ki thaiñ ba marjan kiba shah ktah ha utei u jumai uba jur, ha kaba 22 tylli ki iing ki la julor khoit ha utei u jumai ba shyrkhei.
U nongpyllait im, u Teddy Fontillas, 56 snem ka rta, u iathuh ha ki nongthoh khubor, ba um shym la ioh thiah satia, da kaba bynrap, ba don ki nongpang, kiba la hap ban pynkynriah noh sha kiwei pat ki jaka sumar namar katei ka hospital kaba don ha Bogo, ka la dap briew lypa.
Ha ki video ba la saphriang paidbah, la iohi pat ruh ia ki nongñiah ar shaka kiba la hap ban sangeh bad ban snoh ha ki jingker kiba don ha ki rud surok naka bynta ka jingim ba kordor jongki, katba ka jingkhieh Cebu ka dang khynñiuh jur namar jong utei u juma.
