Shillong, Risaw 01
U Chief Secretary bathymmai ka Meghalaya u Dr Shakil P Ahammed ula pynpaw ïa ka jingkyrmen ïa ka lawei jong ka Jylla, da kaba pynpaw ïa ka jingskhem jingmut shaphang ki jingthmu (Plan) jong ki kam pynroi ki ban ïaid slem kiba thmu ban kyntiew ïa ka kam pynroi haduh u snem 2032.
Haba shimti ïa kane ka kyrdan kaba thymmai, u Dr Ahammed ula kular ban btin lynti ïa ka jingpyrshang ka Jylla ban pynurlong ïa ki thong ki jong ka.
Katkum ka jingong ka jong u, ka jingthmu (Plan) kiba la kdew da u Myntri Rangbah ka Jylla u Conrad K Sangma, kala kdew ïa ka lynti ïaid kaba shai kdar na ka bynta ka roi ka par jong ka Jylla.
“Kum uwei na ki dkhot ba la rangbah ha ka kynhun, ngan pyrshang ban btin lynti ïa ki, kaban long kaba kloi, sted bad kaba bha hapoh ka jinglah ka jong nga. Nga skhem jingmut ba ka kynhun baroh kawei kan trei shitrhem, trei thikna bad khamtam hapoh ka jingïalam jong u Myntri Rangbah bad ki Myntri Sorkar, ngin lah ban pynurlong ïa ka,” ong u Dr Ahammed haba ïakren bad ki nongthoh khubor ha ka sngi Ba-ar.
Haba jubab ïa ka jingkylli, u Dr Ahammed u la pynpaw ïa ka jingdon ïa ki kabu ban ïohkam ïohjam ha ka liang ka Finance khamtam eh ha ka Fintech bad Accounting. U la ban jur ba ka Jylla kala trei ha kata ka rukom jong ka jingthmu ha ki liang ki bapher-bapher, ïa kaba yn sa khmih bniah bha ban ithuh ïa ki jaka kiba don ki kabu bad ban ai jingkyrshan.
Na ka bynta ban pynbha shuh-shuh ïa ka rukom treikam hapoh ka Jylla, u Chief Secretary bathymmai u la pynpaw ïa ka jingkyrmen skhem halor ka Jylla Meghalaya ba ka long ka jaka kaba biang tam ban treikam. U don ruh ïa ka thong ban pyndep ïa ki thong kiba la buh ïa kiba la dep ban kdew bad ban ïatreilang bad ka kynhun ban pynurlong ïa ki.
Ka jingpynleit jingmut kan long halor ki buit treikam kiba lah ban seisoh kumba la pynbna da u Myntri Rangbah ka Jylla ban pynthikna ba man la ki jingthmu bad ki projek kin sei ïa u soh ka jingjop, u la pynkut.
