Shillong, Risaw
Ka Sacred Heart Girls’ Higher Secondary School, Mawlai, ha ka 29 tarik u Nailur 2025, ka la pynlong ïa ka jingïakop rwai choir hapdeng ki skul bapher-bapher ha ka St.Dominic Parish Hall, Mawlai halor ka phang “Pilgrims of Hope”.
Ïa kane ka jingïakop la pynlong kum ka jingkynmaw burom ïa ka snem Jubili Pilgrims of Hope.
Ha kane ka jingïakop la don haduh 13 tylli ki skul kiba na Sor Shillong, kiba la wan ban ïashim bynta.
Ha kane ka jingïakop, ka St.Mary’s Higher Secondary School, Laitumkhrah, ka la ïoh ïa ka nam lahduh, ka Auxilium Girls’ Higher Secondary School, Nongthymmai, ka la wan ha ka kyrdan kaba ar bad ka Sacred Heart Boys’ Higher Secondary School na Mawlai, ka la ïoh ïa ka nam kaba lai. Ka Kong Rimaya Manners kaba dei ka Director jong ka DERT ka la ïadonlang ha kane ka sngi kum ka Kongsan.
Ha kane ka jingïakop, ki nongbishar ki long u Bah Christopher Kurbah (Asst. Prof., Indian Classical Music, NEHU), u Bah Nazarius Kharkongor (Choir Master, Divine Seraph Choir) bad u Bah Anderson Damon Warlarpih (Solo Artist). La sam ïa ki khusnam bad ka song pisa sha ki nongjop da ka Kongsan, kata ka Kong Rimaya Manners.
