Jowai, Risaw 01
Ka Riatsaliya Mihmyntdu ka la ïoh ban rah ïa ka nam lahduh ha ka lympung ïalehkai 3rd Division Football Tourna-ment na ka bynta ka 5th Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka la lah ban pynliem noh ïa ka SCSC Nonglatem lyngba ka tie-breaker da 4-3 kol ha ka sngi Balang ha Kiang Nangbah Stadium, Jowai.
Da kaba ïoh rung sha ka jingïakhun final, baroh ar kine ki klob mynta ki la kiew kyrdan sha ka Second Division ha kaba kin ïoh ban shim bynta naduh u snem ban wan.
Haba phai sha ka jingïalehkai jong kine ki artylli ki kynhun, ka la long kaba ïakhaid bha, wat hadien ka jingkut noh jong ka por ïalehkai ha kaba la hap ruh ban rah noh sha ka ‘extra time’ kaba mar 7 minit shiliang.
Ki rangïalehkai ka Riatsaliya Mihmyntdu ki la pyrshang ban kyntiew ïa la ka rukom ïalehkai jong ki ha kaba bun bah ki khep ki la ïoh ïa ki kabu ksiar, tangba kim shym la lah ban pynurlong sha ki kol bad baroh ka bol kaba ki ïoh bad thmu ban thep sha ka jar kol, ki la shu lait sharud.
Hynrei, wat hadien ba la dep ïaid ka jingïalehkai jong ka ‘extra time’ ym shym la don ba lah ban thep kol hapdeng kine ki arliang mamla, kaba la pynlong ïa ka rai nongjop ban jam sha ka jingïashut tie-breaker bad dei hangne kaba la pynlong ïa ka Riatsaliya Mihmyntdu ba ka khur syndon ïa ka jingjop.
Da kane ka nam jop ka Riatsaliya Mihmyntdu ka la ïoh ban khur ïa ka song pisa kaba T. 30,000 tyngka ryngkat bad ka trophy, katba ka SCSC Nonglatem ka la ïoh T. 20,000 hajar tyngka ryngkat bad ka trophy.
Ha kane ka sngi la sam ruh ïa ki khusnam sha ki rangïalehkai ba kynsai, ha kaba ïa ka nam ‘Man of the Match’ la ïoh ban khur da u Bankerlang Rynjah na ka SCSC Nonglatem, ‘Best GoalkKeeper’ ka leit sha u Kyntulangki Chyrmang na ka Riatsaliya Mihmyntdu, ïa ka nam ‘Top Scorer’ la ïoh da u Meban Kharsoti na ka Mihmyntdu Riatsaliya hadien ba u la thep 7 kol ha kane ka lympung bad ka nam ‘Player of the Tournament’ la ïoh da u Ditol Langshiang na ka SCSC Nonglatem.
Ha kane ka sngi la donlang u Assistant Directorate of Sports & Youth Affairs ka sorkar Jylla bad uba long ruh u District Sports Officer (DSO) ka West Jaiñtia Hills District u Bah Khroobok Passah kum u kongsan ha ka jingïadonlang ki bahaïing hasem u (L) Adelbert Laloo. La donlang ruh ki nongïalam bad dkhot nongkitkam ka WJDSA ba kynthup u Working President ka WJDSA uba dei ruh u khun jong u (L) Adelbert Laloo u Bah EMH. Passah, u General Secretary Ma Lammat-O Laloo, Vice Presedent Bah Patrick Lamare, ka Kong Ri-iohlang Dhar kaba dei ka National Referee, u Football Secretary u Bah Nangebormi Suting nalor ki paidbah nongkyrshan jong ki arliang kynhun.
