Shillong, Risaw 01
Ki nongkamai taksi ha Rynjah kata ka Rynjah Taxi Service Association kaba hap hapoh ka kynhun jong ka Synjuk Nongkamai Taksi sor bad khapsor ha ka step jong ka 1 tarik mynta u bnai ki la pynpaw ïa ka jingbym sngewïahap ïa ka jinglum bai ïeng kali ka Sorkar lyngba ka tnat Pynroi Sor ban lum bai ïeng kali kamai 50 tyngka shi sngi.
Ha kane ka sngi, ki nongïalam ka kynhun nongñiah taksi sor bad khapsor bad ki nongïalam ka Rynjah Taxi Service Association ryngkat ki nongkamai taksi ki la ïa mih ban ïa shim ka rai ban nym ai wat tang shi tyngka ruh namar ba ki la siew lut ïa ki kot kali bad ruh ïa kakhajna surok (road tax) bad ban shu siew 50 tyngka shi sngi ka la ktah ïa ki.
Haba ai jingkren, ki nongïalam ka kynhun ki la pynpaw ïa ki jingbym sngew ïahap ïa kane ka jingleh ka Sorkar. U Bah Feadrick Nongkhlaw, President ka Rynjah Taxi Service Association u la ong ba lada siew tyngkhat lano kam da ktah than hynrei ban siew man ka sngi ka la ktah bha ïa ki namar kiba ñiah kali kamai ki bun kiba shu ñiah bylla ym dei ba ki ñiah kali lajong.
“Ki don ki khun ki kti, ki don kiba dang marwei ruh ki hap peit ïa ki para ki pyrsa, ka shem jynjar bad ngi baroh ka association bad ki dkhot ngi la shim ka rai ban nym siew,” u la ong.
Na ka liang u President ka Synjuk ki nongkamai taksi sor bad khapsor u Bah Kmenlang Khonglah u la ong ba kane ka ka dor 50 tyngka ban siew bai parking sha ka Sorkar, ka Synjuk kam lah ban pdiang namar ki kamai ki ïeng kylleng-kylleng bad lada siew 50 tyngka ka lah ban poi da ki spah bad ka la ktah jur.
“Ngi kiba siew road tax ha ka jingshisha ka Sorkar ka dei ban pyrkhat bad baroh ki khajna ngi siew lut te ka Sorkar ka donkam aiu ban shim ïa kane ka bai parking,” u la ong.
U la ong ruh ba ka Sorkar ka shim kabu ban lum 50 tyngka bad ka khlem da pyrkhat ba man ki jaka hap siew bai parking ym dei tang ha Rynjah.
Shuh-shuh u la ong ba ka Sorkar kam pyrkhat ïa ki jingeh ki nongkamai taksi hynrei ka la shu pyrkhat tang ïalade na ka bynta ban ïoh lum pisa kumjuh ruh la ong ba ynda ka Sorkar ka la khot ïakren ïa ki, kin sa pyrkhat la kin siew ne kim siew ïa ka bai parking.
