Mawkyrwat, Risaw 01
Ka Mawkyrwat Market Committee Sankur Ri Kynti Khain Nonglang bad Mawkyrwat Hat kaba deit peit bad long trai ïa ka ïew Mawkyrwat ha ryngkat ki kynhun sengbhalang bapher-bapher naduh ka HITO, KSU, HYC, HANM, ki Seng Longkmie, VDP Mawkyrwat, Seng Samla Shnong Mawkyrwat ha ryngkat ka ophis jong u District Swachh Bharat Mission South West Khasi Hills District ha ka 1 tarik u Risaw, 2025 ki la pynlong ïa ka jingpynkhuid ïa ka ïew Mawkyrwat bad baroh ki kyndong kynshrot khnang ban wanrah biang ïa ka khuid ka suba bad ka jingshngaiñ.
Ha kane ka sngi la ïoh ruh ban pynlong ïa ka jingïalang ba lyngkot ha parking lot jong ka ïew bad la ïoh ban pynshai paidbah ha kaba ïadei bad ka jinglehkhuid bad ka jingpynkynriah noh ïa ki nongdie madan kiba shong ha surok sha basa die doh, kaba mynshwa la shong beaiñ da ki nongdie kyiad kum shi bynta ban wanrah ïa ka khuid ka suba bad ka jingshngaiñ ha katei ka jaka bad ka jingpynkynriah ïa ki nongdie madan ka long kum shibynta ban pynlait na ka jingkhapngiah bad ka jingpynwit ïa ka ïaid ka ïeng ki paidbah bad ki kali. Kum ban shu kdew, ka ïew Mawkyrwat katba nang mih ki sngi kam don shuh ka jingshngaiñ ha ki katto-katne ki bynta jong ka ïew khamtam ha ki thaiñ basa doh namar ka jingkharoi ki kam sniew kum ka jingïadih kyiad, jingïadih drok bad ki kam lute, kam pynïap briew.
Shuh-shuh ym tang katta, ka jingjakhlia kala long shaba palat ha kaba la dap satang ki jaboh jabaiñ kum ki plastik, ki bilor kyiad bad ka jingleit shabar khlem akor ha ki kyndong kynshrot kaba wanrah ïa ka jingïsaitmet haduh katta-katta.
Watla katta ruh ka jingkyrmen ka don, ha kaba ka jingpynkhuid ïa ka ïew Mawkyrwat ha katei ka sngi ka la long kaba jop lyngba ka jingïasnohkti lang jong baroh kynthup naduh ki nongshong ïew, ka tnat Fire & Emergency Service bad kiwei-kiwei.
Kumta ki nongïalam jong ka Sankur bad baroh kiba ïa donkti ha kane ka kam, ki kyntu ïa ki nongdie madan ba kin ai ka jingïatreilang ba ynda la dep pynkhuid ïa katei ka jaka ba ki dei ban leit shong, khnang ba ki nongdie kyiad bad ki nongleh kam sniew kin ym ïoh lad shuh, kum shibynta ban wanrah ïa ka jingitynnad, ka jingshngaiñ bad ka jingkylla dur biang jong ka ïew Mawkyrwat.
Kiba ai jingkren kane ka sngi ki long ka Kong M Kharlyngdoh, President Seng Longkmie, Bah WCD Ton, Secretary VDP, Bah Kitborsing Lyngdoh, President, Seng Samla Mawkyrwat, Bah YG Lyngdoh, Bah Bitnam Nongsiej, Bah S Marshangbai, DPM, DSBM SWKHD bad kiwei-kiwei.
