Shillong, Risaw 01
Ka lahduh jong ka aïom ba la lah, ka Shillong Lajong FC ka la wanphai biang sha ka kyrdan ba-ar ha ka Shillong Premier League, hadien ba ka la lah ban beh naduh na ka 0-3 kol ban pynliem kylla ïa ka Mawlai da 4-3 kol ha ka sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba u Emanbha Marbaniang (58 & 67) bad u Deibormame Tongper (64 & 80) hadien ba u Samlang Rympei (22), Fairming Suting (46) bad u Loving Suting (53) ki la thep kol nyngkong na ka bynta ka Mawlai.
Te kumta lyngba kane ka jingjop, ka Lajong ka la ïoh ban knieh noh ïa ka kyrdan ba-ar na ka Mawlai. Baroh ar kine ki kynhun ki la kamai mar 12 point, hynrei ka SLFC ka la tam lyngba ka jingïapher ha ka jingthep kol (+10 to +8). Ïa kyrdan ba hakhlieh la bteng ban bat da ka Nangkiew Irat kaba la kamai 13 point.
Lyngba kane ka jingjop ka la pynïoh jingkyrmen ïa ka Lajong na ka bynta ban bteng ha ka jingïaknieh na ka bynta ban ïoh ïa ka nam lahduh ha ka SPL ryngkat ka Mawlai bad ka Nangkiew.
Ha kane ka jingïakhun jong ka kylla step, u Samlang u la ïoh ban pynkhih jar tang marwei na ka bynta ka Mawlai hadien ba u la ïoh ban shut bad ka la leit dei na u rangïalehkai ‘dien bad ka la pynlong ïa u rangapkol ka Lajong u Wanteilang Malngiang ban shem jingeh na ka bynta ban pyllait na ka jingshah thep.
U Deibormame u la ïoh ban shut ïa ka bol hynrei um shym la lah ban pynurlong bad u Wanteilang u la lah ban pyllait na kaba shut free-kick da u Brolington Warlarpih.
Hynrei tang hadien shi minit ba la bteng ïa ka jingïakhun jong ka kylla miet, u Fairming u la ïoh ban shut da kaba tyngeh ha kaba ka la rung hi jlang. Hadien hynñiew minit u Loving u la ïoh ban rah ïa ka bol na shiteng madan ha kaba u la ïoh ban thep hi jlang bad ban tam da 3-0 kol.
Watla ka Mawlai ka la thep haduh lai kol, hynrei kam shym la long ka jingpynduh mynsiem ïa ki rangïalehkai ka Shillong Lajong ha kaba ka la bujli noh da u Emanbha ha kaba ka la wanrah ka jingkylla hapoh kane ka kynhun. U Deibormame u la ïoh ban pynbuh bol bad u Emanbha u la lah ban pynphai kylla. Hadien hynriew minit kane ka kynhun ka la ioh biang ban thep kol lyngba u Deibormame. U Emanbha Marbaniang u la thep biang sa shi kol ha ka minit kaba 67 na ka bynta ban pynlong ïa ka kynhun ban ïakhaid mar 3-3 kol.
Hashwa ban wai ka Lajong ka la lah ban pynurlong biang sa shi kol ha ka minit kaba 80 lyngba u Deibor bad ban khur syndon ïa ka jingjop.
Kane ka lympung kan bteng ha ka sngi Thoh-dieng ha kaba ka Malki kan ïakhun pyrshah ïa ka Rangdajied United ha ka por 4:30 nohphai sngi bad kane kan long ka jingïalehkai kaba nyngkong jong ka wat kaba hynñiew.
