Ka bynta jong ka surok kaba don na Laitlyngkot shaduh Pynursla kaba dang pyntrei mynta da ka National Highway & Infrastructure Development Corporation Limited (NHIDCL), ka la pynsyrtok shi katdei eh ïa ki nongleit nongwan khamtam ki paid jong ka Riwar Mihngi namar ka jingtwa kaba khari-khari jong u lum bad khyndew. Ngi la sakhi ba ym tang ba ka la pynsyrtok hynrei ka jingtwa khyndew bad u lum, ka la wanrah ruh ïa ki jingjia kiba sngewsih na ka jingduh noh ïa ki mynsiem briew na ka jinghap jong ki kali sha ki riat, kaba la jia bunsien.
Ym lah ban tip ne sngewthuh ba na kaei ka daw ba ka jingshna ïa kane ka surok ka shimpor bad suki shaba palat. Ka projek Shillong-Dawki Road ka dei kaba la bei tyngka da ka Japanese International Cooperation Agency (JICA) ha ka jingmang pisa kaba kot shaduh ka T.1377.5 klur. Katkum ki jingïathuh jong u Symbud Myntri Rangbah ka Jylla u Bah Prestone Tynsong, ïa ka bynta jong ka surok na jingkieng Umshyrpi haduh Hynñiew Mer la buh ban pyndep ha u bnai Nohprah, mynta u snem katba ïa ka bynta ba sah jong ka surok shaduh Dawki la buh thong ban pyndep ha u Nohprah, 2026.
Ngi la sakhi ba halor kane ka jingtrei kaba la suki bad pynsyrtok ïa ki nongleit nongwan, ki la mih kiba bun ki kynhun ban pynsngew ïa ka jingsngewkhia bad ruh ban dawa na ka NHIDCL ba kan pynsted ïa ka kam. Ka surok na jingkieng Umshyrpi ka dei kaba kongsan bha namar ka pynïasoh bad ki district kiba bun bad ka nongbah Shillong bad la ong ba ka kam ka la ïaid shakhmat bad ka la jan dep.
Hynrei ka bynta jong ka surok sharum Laitlyngkot ban poi sha Pynursla ka dei kawei na ki bynta kaba pynsyier shi katdei eh ïa ki nongleit nongwan khamtam haba ki poi lei ha ki bynta ba don ka jingtih bad ot ïa u lum. Ngim lah ban tip balei ka kam ka suki bad haba leit ba wan, bunsien ju shem ba kat ïa kane ka projek kaba heh hynrei ka jingdon jong ki nongtrei i kumba dei ka jingtrei kaba rit.
La ju sakhi ba tang haba don ka jingtwa khyndew ne jingïap briew ba ka Sorkar ka hiar pynsted ban leit jurip ne peit ïa ka jinglong jingman bad ruh haba don kiba ïakhih bad pyrta lait nangta i kumba kam don jingpatiaw satia ban peit kumno ka jingtrei ka ïaid ne ban bthah ïa ki nongpyntrei ba ki dei ban pynïaid sted ïa ka kam bad lada kim lah dei ban leh da kaba tyngeh. Barabor la ju sakhi ba kino-kino ki projek kiba wan bad pyntrei, ki la don beit da ka por ban pyndep hynrei kiba bun ne jan baroh, ym ju lah satia ban pyndep ha ka por bad dei tad hadien bun-bun snem ba sa lah ban pyndep. Ym lah ban tip kaei ka daw halor kane, balei ym lah ban pyndep biang por ïa ki projek. Kine ki rukom ki dei kiba ju wanrah bad pynïakynduh jingeh ïa ki paidbah.
Imat ka NHIDCL ka klet ba kane ka surok ka ïalam sha Dawki-Tamabil kaba dei ka lynti ïaid ki kali ban khaïi pateng sha Bangladesh. Kam dei ka surok kaba malu-mala. Da ki phew hajar ngut ki hap ban shaniah ha kane ka surok na ka bynta ka jakpoh ka jong ki. Lada ka surok kam biang, ka kamai kajih jong ki paidbah ruh ka shah ktah jur. Nalorkata, ka ktah ruh ïa ki briew kiba donkam ïa ka jingshah sumar sha Shillong bad kiwei ki jaka. Ban shong kali ha ka surok sniew, ka ktah shikatdei ïa ki briew ki bym don hapdeng ka met kaba koit. Ha kajuh ka por, ka ktah ruh ïa ka jingleit jingwan ki nongjngohkai pyrthei. Tang ka jingduh suda kat shaba phai. Lada ka long ha kane ka dur, ka Sorkar ka la dei ban ym ai ïano-ïano ban shna ïa ka surok bad ban pynneh beit ïa ka surok barim kaba kham skhem bad kham shngaiñ.
