Washington, Risaw:
U heh spah jong ka ri America, U Elon Musk, u la weng noh ïa ka jingiashim bynta lane ka jingkyrshan (Subscription) jong u ha ka rynsan pynbyrngia ‘Netflix’, hadien ba u Hamish Steele, u ba long u nongshna ïa ka phlim Animated Series ‘Dead End: Paranormal Park’, u la kynnoh ba u la rkhie beiñ ïa ka jingshah pynïap dusmon jong u nongialap uba long ruh u nongkyrshan jong u Trump ha u bnai ba la dep, u Charlie Kirk.
Ka jingtrei jong u Steele ha ka rynsan Netflix ka la don lypa hapoh ka jingpeit bniah namar ba la pynrung ïa ki phang jong ki briew kiba kylla shynrang ne kynthei ha ka phlim jong ki khynnah. Ka jingkynthoh ka la nang kiew stet hadien ba ki jingshon dur ba bun jait jong kawei ka post ba la kynnoh ba ka pyni ia u nongthaw ba u pyndonkam ia ki kyntien sniew bad khot ia u Charlie Kirk u “Nazi” ki la bna paidbah bha.
Kane ka rai ka long kum ka jubab halor ka jingkren jong u Myntri Rangbahduh ka UK, u Keir Starmer halor ka jingshah pyniap jong utei u nongialam jong ka Conservative.
