Jowai, Risaw 01
Ka aiom synrai kadei ka aiom kaba ki nongrep ki phuh samrkhie namar ba u kba uba ki la thung la bet u la ih bad ka por ka la dei ïa ki ban ot noh ïa u, hynrei ki nongshong shnong jong ka Lapangap hapoh ka West Jaiñtia Hills District ki don haka um dum, hato kin ïoh ot ne em ïa u kba ba ki la thung bad bet namar ba ki nongshong shnong Karbi ki siat da ki jri siat sim ban pynthut ïa ka jingot kba ka jong ki.
Kine ki pynthor kba jong ki nongshong shnong Lapangap, ki don mar-khap bad ka Shnong Tahpat jong West Karbi Anglong District, Assam bad naduh ka 25 tarik Jylliew, 2025 kitei ki ar shnong ki don hapdeng ka jingïakajia.
Ha ka 1 tarik mynta u bnai, ki nongshong shnong Lapangap ki la mih paidbah da ka jingthmu ban ot kba hynrei marsynpoi sha ki pynthor, ki la kyndit ba ki Karbi ki la ker tawiar na shiliang lum ryngkat bad ki pulit Assam.
Ynda haba ki nongshong shnong Lapangap ki la poi kham shajan ki pynthor, ki la ngat pynban ha ka jingshah siat maw da ki jri siat sim ha ki Karbi bad kumta ym banse ki hap ban phet krad noh khnang ban lait na kano-kano ka jingmynsaw.
Ki pulit Meghalaya kiba shong ba sah ha Lapangap ki leit tang haduh jingkieng Job Card namar bym ïoh jingbit na ki bor bahalor.
Ki nongshong shnong ka Lapangap ki dap da ka jingsngewbitar halor ka jingbym ai bor jong ka Sorkar Meghalaya ïa ki pulit jong ka ban synran lang ïa ki shaduh ki pynthor kiba don markhap ïaka Shnong Tahpat jong ka West Karbi Anglong District.
Haba ïakren bad u Waheh Shnong ka Shnong Lapangap u Ma Deimonmi Lyngdoh ula ong ba kan sa poi ka por ba un nym lah shuh ban tehlakam ïaki nongshong shnong ban tur shaphrang bad ïakhun markylliang bad ki Karbi.
Ula ong ba ka Dorbar Shnong Lapangap ka la dep pyntip sha ka Sorkar Jylla bad bor pynïaid District ba kin sa ot kba hynrei haduh mynta kim pat ai ïa ki lad jingïada.
