Khliehriat, Risaw 02
Ka Wahïajer Narpuh SSC ka la jam sha ka semi final ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Asso-ciation (EJHDFA).
Kane ka jinglah ban pynthikna ka la wan urlong hadien ba ka la pynliem noh ïa ka Bataw YWSC da 2-0 kol ha ka jingïakhun quarter final kaba la long ha ka sngi Palei ha madan artificial turf Diengshynrum, Khliehriat.
Ha kane ka jingïakhun baroh ar ki kynhun ki la pynpaw ïa ka jingtbit ha ka rukom ïalehkai bad kane ka pyni ïa ka jingïaryngkat bor ha ka rukom ïalehkai. Watla kine ki kynhun ki la ïakhun tyngeh, hynrei haduh kaba kut jong ka kylla step kim shym la lah ban thep kol.
Dei ha ka kylla miet ba ka Wahïajer Narpuh ka la ïoh ban pynkhih jar nyngkong eh lyngba u Den Mukhim ha ka minit kaba 50. Kane ka kynhun ka la thep biang ïa ka kol kaba ar lyngba u Santosh Teron ha ka minit kaba 61. Haduh kaba kut ka jingïalehkai ka Bataw kam shym la lah ban pynphai bad ka la mad ïa ka jingshah rem.
