Shillong, Risaw 02
Ha ka jingrakhe ïa ka Gandhi Jayanti, ka Sorkar Jylla ka la pynlong ïa ka jingleh burom ban buh syntiew ïa u motdur ba shi rynieng u Mahatma Gandhi u ba don ha Rilang Building (Main Secretariat) Shillong, ha kaba ki heh ophisar, ki nongtrei bad kiwei-kiwei ki la ïashim bynta ban buh syntiew ha ka lyngkhuh sngi kha ba 156 snem jong u kpa ka Ri India.
Ïa kane ka jingrakhe la ïalam da u Dr. Shakil P Ahammed u ba long u Chief Secretary ka Jylla Meghalaya, u ba la buh syntiew ha u mot jong u Mahatma Gandhi kum ka dak ka jingburom bad jingkynmaw ieit ïa u. Ha kane ka jingleh burom la don lang ruh u Vijay Kumar Mantri uba dei u Commissioner bad Secretary ka tnad Information and Public Relations, u Swapnil Tembe, u Secretary ka tnad pule puthi bad ka Kong R.M Kurbah, ka Deputy Commissioner ka East Khasi Hills bad kiwei-kiwei ki heh ophisar.
U Dr. Shakil P Ahammed, haba ai jingkren ha katei ka jingrakhe, u la pynshai ïa ka jingïadei u Mahatma Gandhi ha kane ka juk ba mynta khamtam ban pynksan ïa ka jingshisha, ka jinglong sngewrit bad ka jingïatylli.
U la kyntu ruh ïa ki heh ophisar ban bat ïa ki mat ba kordor kiba u Mahatma Gandhi u la im bad aiti bad ruh ban pynshlur ïa baroh ban pynpaw ïa ki nongrim ha baroh ki liang la ha ka kam paidbah ne ka kam shimet.
