Shillong, Risaw 02
Kum ka sienjam ban pyndonkam noh da ki kor digital ha ka jingpynïaid kam, ka jingïalang jong ka Kynhun Myntri ka Sorkar Jylla kaba la dep, kala sdang pyntreikam ïa ka e-cabinet system, kaba pyni ïa ka jingkylla sha ka rukom synshar khadar ba khlem pyndonkam shuh ïa ki kot ki sla.
Haba kren sha ki lad pathai khubor, u Myntri Rangbah Conrad K Sangma u la pynbna ïa kane ka rukom treikam ba thymmai ka ban pynlah ïa ka Kynhun Myntri ban treikam online noh, ban pynlong ïa ki kam shim rai kiba kham biang, kham shngaiñ bad ka bym pyndonkam shuh ïa ki kot ki sla.
U la ong ba ka e-Cabinet system ka ailad ïa ki Myntri Sorkar ba kin ïohlad bad bishar ïa ki kot ki sla, ki mat bad ïa ki rai bala shim ha ki por bala leit da kaba khmih online na ki kor ne tiar kiba shngaiñ bad ba kyrpang. Kane ka rukom treikam ka pynlah ban ïoh ïa ki rai jong ka Kynhun Myntri bala shim ha ki por bala leit noh, kan pynlah ban wad bniah bad shim nuksa katkum ki sobjek.
“Ki mat ïakren jong ki jingïalang Kynhun Myntri kin sa wan noh ha kane ka e-Cabinet bad ym kut tang hangne, ka jingai jingmynjur ruh kan long noh online khnang ba kan long ka Kynhun Myntri ba khlem pyndonkam shuh ïa ki kot ki sla bad kaba lah ban trei ïa ki kam da ki kor electronic,” ong u Conrad.
