Shillong, Risaw 02
Ka jingtwa ha ki bynta jong ka surok na Laitlyngkot sha Pynursla kaba ju jia jan manla ka por, ka la wanrah ïa ka jingsyier ha ki nongleit nongwan bad ruh ki nongñiah kali kiba ju ïaid lyngba jong katei ka surok.
Ha ka janmiet jong ka 2 tarik mynta u bnai, ki video kiba la ring ïa ka sharing lum harud surok Laitlyngkot sha Pomlum ki pyni ba katei ka sharing ka la sdang twa biang namar ka jingslap. Kane ka sharing lum ka la twa ha ka taïew ba la dep bad wanrah ka jingbym lait kali kaba haduh lai sngi lynter.
Kane ka bynta ka hap ha ka Package II jong ka projek surok na Shillong sha Tamabil ba la shim pyntrei na ka National Highway Infrastructure and Development Corporation Ltd (NHIDCL) da ka YFC & ACE Company.
Naduh ki snem 2018-2019 ba la sdang ïa kane ka surok, ka leit ka wan kam shym long shuh kaba shngaiñ bad la don ruh ki jingjia ïap briew na ka jinghap kali khamtam ha ki bynta jong ka Riat Rngain.
Bun ki nongshong shnong, ki nongïalam shnong, ki riew rangbah, ki sengbhalang ki la pynpaw ba ka jingpakhang surok ka la ktah ïa ki bad don pat kiba ong ba ka dei ka jingsuki treikam palat jong katei ka kompeni kaba pyntrei nalor ka jingleh sting jong ka.
La ong ba ka kompeni kam pyrkhat shuh ïa ki paidbah ba kin ïaid bad ïeng ha ka jingshngaiñ bad jan man ka por la shu buh da ka por ba ki paidbah kin leit kin wan.
Dang shen ha ka jingjia twa katei ka sharing lum, u Bah T Khongkrom, Assistant PRO ka kompeni ba shna ïa ka surok u la ong ba dei na ka jingpynbthei ne blasting bad la don kiba mynsaw katba u Bah Prestone Tynsong, MLA ka Pynursla bad Symbud Myntri Rangbah ka Jylla ba dei peit ïa ka tnat PWD (Roads) u la ong ba kam don jingpynbthei eiei ruh em haba kren sha ki lad pathai khubor.
Kane ka paw ba ka lah ban don ka jingthok ka kompeni ïa u Symbud Myntri Rangbah ha ka jingwan jngoh jong u ïa katei ka jingtwa bad haba pyrshang ïakren bad u PRO kane ka kompeni pynban um shim satia ïa ka phone jong u.
Shuh shuh ki nongshong shnong kiba shong ha ki jaka riat ha arliang katei ka surok ki mad jingsyier mynsiem na ka jingpynhap maw katba lap ba shem da ka kompeni bad khamtam ka jingpynbthei bom pynpra maw khlem da buh por.
Kine ki jingmudui ki la poi sha shkor ka ophis SDO Pynursla Civil Sub-Division bad kumjuh sha ka NHIDCL hynrei ym shym la don kano-kano ka jingshimkhia satia ban maham ïa ka kompeni bad ka don ka jingkynnoh ba katei ka kompeni ka leh katba mon namar ba ka don ka jingaimon ïa ka da ki briew ba don ha ka bor.
Ki riew rangbah, ki nongïalam sengbhalang kumjuh ki nongshong shnong ha katei ka thaiñ ki kwah ba ka kompeni kan pynkloi ïa ka kam namar la jan kot phra snem ki la ïaid lyngba katei ka surok hapdeng ka jingsyier mynsiem.
