Shillong, Risaw 02
Ki khubor ba dang shen bad ki jingpynbna ba la saphriang bha ha ki rynsan Social Media, ha kaba ïadei bad ki kam tih mawshun beaiñ ha ka shnong Lum Bangla, kaba hap hapoh ka Elaka Nongkhlieh Dolloiship, East Jaiñtia Hills District, ki la paw pyrthei biang sa shisien ïa ki jingduna kiba paw shynna ha ka synshar khadar ha kane ka thaiñ.
Ha ka kyrwoh ba la phah da u Bah Kerlang Ksoo u la ong ba kaba kham phylla shuh-shuh ka long, ba wat u MLA na Mawlai Konstitwensi ha East Khasi Hills District u la leit jngoh ïa katei ka thaiñ uba dei u MLA uba don ha ka thaiñ kaba jngai na ka jingsynshar ka shnong Lum Bangla, ban pynshisha ïa ka jingdon kum kine ki kam kiba dang ïaid shakhmat. Ha ka jingleit jurip jong u, la ïohi ba ka jingtih dewïong beaiñ ka dang ïai bteng khlem sangeh ha ka shnong Lum Bangla, wat mynsngi mynshai ruh, bad wat hapdeng ka jingkhang kaba la slem bha da ka National Green Tribunal (NGT).
U la ïathuh ba la pyrshang ban ïakynduh bad ki heh pulit jong ka District, ha kaba ïadei bad katei ka kam, hynrei utei u ophisar u la pynpaw ba um don ha katei ka jaka. “Kane kam buh tang ïa ki jingkylli kiba khia shaphang ka jingkit khlieh hynrei ka pynpaw ruh ïa ka dur kaba pynsngewsih ïa ki bor pynjari aiñ kiba pynpaw ïa ka jingbym tip eiei ne ki ïadon bynta lang ha kane ka kam. Ki paidbah ka East Jaintia Hills ki dei hok ban ïoh ïa ki jubab halor kane,” la ong u Bah Kerlang.
U Bah Kerlang u la ong ba ka thaiñ Lum Bangla ka hap hapoh ka konstitwensi jong kawei ka MLA na ka seng NPP, kaba paw bha ha ka ban leit jurip ïa ki jaka pynroi man ka por. Hynrei, ha ka jinglyngngoh bad jingsngewsih jong kiba bun ki paidbah ka long ba ym shym la ïohi ïa kum kine ki jingpeit bniah ne jingïarap haba ïadei bad ki kam tih mawshun beaiñ. Da kaba buh jingkylli ruh ba kumno ka nongthaw aiñ ka khlem tip ïa ki kam be-aiñ kiba la pur sted hapoh la ka jong ka konstitwensi ruh?.
“Kaba pynduh mynsiem eh ka long halor ka jingsngap jar jong ki nongmihkhmat jong ngi hi ha East Jaiñtia Hills. Lada u MLA na kawei pat ka District u lah ban rung ban sakhi bad ban pynpaw ïa ki jingeh, ba kaei ka daw ba ki nongïalam shnong jong ngi, ki don na ka bynta ka jingbym leh eiei jong ki? Ka jingbym lah jong ki bor district ban pyntreikam ïa ki bor jong ka aiñ bad ban ïada ïa ki nongshong shnong na ka jingshah lehbeiñ, kam dei tang ka jingbym shimkhia hynrei ka dei ka jinglehbeiñ ïa ka jingshaniah jong ki paidbah,” u la ong.
Shuh-shuh u la ong, “Ki paidbah jong ka East Jaiñtia Hills, ki shu sah ha ka jinglyngngoh, hato ka aiñ ka long kaba la jied ne-em – kaba pyrkhing ïa kiba duk. Ka jingtih mawshun be-aiñ ka la kylla long ka dak ha ka nam jong ka district, bad lymda kim shim ïa ki sienjam kiba kyrkieh, kan dang ïai bteng ban pynduh ïa ka jingshaniah bad jingngeit jong ngi ki paidbah ha ka jingsynshar.”
Nalor kata, u ong ba kane ka kam ka dawa ïa ka jingtohkit mardor, ka jingkitkhlieh na ki bor synshar district, bad ruh na ki nongmihkhmat jong ka thaiñ hi baroh kawei.
