Shillong, Risaw 02
Ka United Democratic Party (UDP) kan sa thoh shen sha u Myntri ka Environment, Forest bad Climate Change, ban pynpaw ïa ka jingpyrshah kaba jur ïa ka Office Memorandum (OM) ba la pynmih dang shen da ka Ministry.
Haba kren sha ki lad pathai khubor, u General Secretary jong ka United Democratic Party (UDP) u Bah Titostarwell Chyne u la pyntip ba ka seng kan sa phah da ka jingthoh sha ka Ministry of Environment, Forest and Climate Change (MoEF&CC) ka Sorkar India ban pyrshah ïa ka Office Memorandum ba la pynmih ha ka 8 tarik, Nailur, 2025.
U Bah Titos uba long ruh u Nongïalam ka Liang Pyrshah ha Khasi Hills Autonomous Dis-trict Council (KHADC) u la ong ba ka jingpyrshah ka long halor ka daw ba ka Office Memorandum ka thmu iuhroit ïa ka hok jong ki paidbah ba kin pynpaw ïa ki jingsngew jong ki lyngba ki public hearing, khamtam haba ïadei bad ka kam tih Uranium.
“Ka seng ka la dep shong jingïalang bad ngi la rai ban ai da ka jingthoh sha u Myntri ka Sorkar Pdeng uba khmih ïa ka tnat Environment, Forest and Climate Change (MoEF&CC),” u la ong bad bynrap ba kin sa phah noh ïa ka shithi sha u Myntri ka Ministry of Environment, Forest and Climate Change halor kane ka kam.
“Ka nongrim kaba ngi pyrshah, ka daw ba kane ka Office Memorandum ka la weng noh ïa ka hok jong ki paidbah ba kin pynsngew ïa ka jingsngew jong ki lyngba ka public hearing. Khamtam ha kaba ïadei bad u marpoh khyndew Uranium, uba ngi tip lada tih ïa u ym dei tangba ka ktah ïa ka koit ka khiah hynrei ka pynjot syndon wat ïa ka mariang. Kito ki jaka kiba don sawdong ka jaka tih Uranium yn ym long shuh ban thung ban tep, ym long shuh ban rep ban riang, ym long shuh ban ri jingri khamtam eh ïa ngi u khun bynriew,” la pynpaw u Bah Titos.
“Na ka liang jong ka UDP ngim pat kwah, ngi dang pyrshah ïa ka jingthmu jong ka Sorkar Pdeng ban tih ïa u Uranium ha kane ka Jylla jong ngi,” la ban jur u Bah Titos.
“Ka Office Memorandum ka khanglad ïa ka kabu jong ngi ki paidbah ban pynpaw ïa ka jingsngew jong ngi. Kaei ka jingktah ïa ki sawdong sawkun baroh, kane ka Office Memorandum ka la khanglad ïa ka hok jong ki paidbah,” u la kynthoh.
“Ngi kyntu ïa ka Sorkar Jylla kaba ngi ïatreilang ba ka dei ban pyrshah ïa ka Office Memorandum,” u la ong.
Haba kylli, u la ong, “ka District Council ka buh ïa kawei ka kyndon kaba ong, “Kano kano ka jingthmu ban tih marpoh khyndew ka don ïa ka lynti ba ka District Council ka dei ban ai ïa ka No Objection Certificate (NoC) ne ka jingai jingbit. Nga sngew ba ka District Council kan pyndonkam ïa ka bor jong ka ba kim (Sorkar India) lah ban leh ïa kano kano ka kam khlem ka jingbit na ka District Council.”
